Nizana Mizoram hmun hniha vanduaina rapthlak tak thlengah mi 21 an thi.
Nizan thim dawn dar 6:30 vel khan Lunglei Lunglawn Field thlanga Pu H. Vanlalpeka in leiminin a hnawl avangin in chung leh hnuaia cheng mi 14 zinga 10 an thi a, an zingah hian naupang 5 an tel a, In neitupa Pu H Vanlalpeka hian a nupui leh a fapa te ber leh a pa bakah a pizawnte chhungkua a chan vek a ni.
Pu H. Vanlalpeka hian in chung zawk a luah a, a hnuai chu a puzawn, Pu Thatlina ten an luah a ni. In pahniha cheng mi 14 te hi leimin hian a hnawl vek a, Pu H Vanlalpeka hian a pa kum 83 mi Pu HC Aipianga, a nupui kum 29 mi Lalchawiliani leh a fa te ber kum 7 mi Peter Lalkroschhuanga te a chan a, a fa u te pahnih kum 10 mi Malsawmkima leh kum 9 mi Zonunmawii te chu vanneihthlak takin an him a ni.
In hnuai lama cheng Pu Vanlalpeka puzawn te chhungkaw zingah an tupa kum 17 mi PC Lalduhsaka tih loh midang zawng chu an thi vek a, Inhnuai lama cheng mitthi te hi Pu Vanlalpeka puzawn Kum 67 mi Pu Thatlina leh a nupui kum 66 mi Pi Darpawngi, an fanu kum 37 mi Laldinpari leh a fate pahnih kum 14 mi Remlalfamkima leh kum 4 mi Cindy Lalhlunmawii te bakah lehkhazira an awmpui kum 13 mi Lalrammawii leh kum 10 mi Chritina Lalnunhrili te an ni. In hi a ban leh beam cement concrete, a bang \henkhat brick leh tile hman pawlh, a chhuat \henkhat concrete, a chung rangva a ni a, an kawm chhak in sak lai a\anga min \anin he leimin hian Pu H. Vanlalpeka in hi a hnawl ta a ni. Leimin in in a chhilh hnua chhanchhuah hna thawk tura a hmun thleng hmasa zinga mi an \henawmpa Pu Lalchhuma chuan a thil hmuh dan hetiang hian Zonet a hrilh.
Nizan a\ang khan Lunglawn mipuite chuan leiminin a chilh te hi an zawng nghal a, tukin khawvar thleng khan ruang pakua an hmu a, a hnuhnung berah Pu HC Aipianga ruang chu vawiin dar 11:50 vel khan an hmu leh ta a ni. Ruang zawnnaah hian Lunglawn khaw mite bakah Police, Disaster Response Force, Adventure Club leh Assam Rifles te pawh an tel a, an ruang hmuh kim hnu hian thil tihfel ngaite tihfel a nih hnuah Lawngtlai District-a Bungtlang South khaw mi 5 te ruang chu an khuaa vui tura thawn chhuah a ni a, Lawngtlai khaw bula Chawnhu khaw mi pahnih ruang pawh vui tura thawn a ni a, midang 3, Lunglawn khaw mite chu vawiin chawhnu khan vui an ni. Vanduaina tawktute hi DM&R Minister, Pu C. Ngunlianchunga, Pu Joseph Lalhimpuia MLA, Pu Chalrosanga Ralte, Lunglei Bawrhsap leh SP te pawhin an tlawh a ni.
Lungleia chhiatna rapthlak tak a thlen a\anga darkar 6 bawr lek ralhnuah chhiatna rapthlak dang thleng lehin Siaha Night Bus, Aizawl a\anga Siaha pana kal chu Rawpui leh Pangzawl inkar, Pangzawl khaw bulah kawng thlangah a tlan liam a, a hmunah mi 9 an thi a, a hnuah damdawi inah mi 2 an thi leh a, thi zawng zawng hi mi 11 an ni.
Mitthi te hi mipa 5 leh hmeichhe 6 an ni a. Anni bakah hian midang 19 an hliam bawk. Pangzawl Branch YMA hotute hnen a\anga thudawn danin thi te hi Driver TBC Lalrinzuala, kum 34, New Siaha, Micky Lalruatliana Siaha, Lalrokunga Bungkawn Vengthar, Aizawl, Lalropuia, Buhchangphai, Thankimi, kum 49, Siaha, |harihnemi, kum 15 New Siaha, Khusi Siaha, Lalrinpuii Siahatlangkawn leh Mongolisingh Lawngtlaite an ni a, hliam na zual 6 Serchhip damdawi ina thawn zinga 2 chu vawiin chawhnu khan an thi leh a, a thi hmasa zawk chu Norothanga, kum 58 mi, Zemabawk Hunthar Veng a ni a, hemi hnu vawiin chawhnu dar 2:20 vel khan Anita chu a hliam tuar lovin a thi leh a, amah hi Siahaa MPRO Sub Inspector, Pu MK Jha nupui a ni. Accident-na hmuna thi te ruang hi Pangzawla Khuanghlum YMA Hall-ah lak a dah khawm an ni a, hetah hian Doctor-in a endik a, Hnahthial Police Station-a Officer-te pawhin tihfel turte an tifela, Pangzawl YMA-in an kuang an siam saka dah an nih hnuah thlahna inkhawm neih a ni a, hemi hnu hian ruangte hi an chhungte hnenah hlana, an khaw lam \heuh panpui an ni. Hliam 19 zinga \henkhat chu Hnahthial damdawi in, Pangzawl damdawi in leh Serchhip damdawi inah te dah an ni. YMA hruaitute sawi danin he bus vanduaina tawkah hian mi 30 an chuang nia hriat a ni a, an chetsual hnu hian a kim thei ang bera inzawn zui a ni a, mi 30 bak chu hriat an nei lo a ni. Bus chetsual hun hi nizan dar 12:30 vel kha a ni a, bus-a chuang zinga mi 3-te chu kawngah an vak chhuak thei a, heng mite hian Pangzawl khuaa in hnai berah kalin an chetsual dan an hriattir a, hemi hnu hian Pangzawl khaw mipuite chuan in aukhawmin bus chetsualna hmun an pan nghal a, ruang leh hliamte an la chhuak nghal a ni. Bus chetsual hma lawk hian Conductor-in he bus hi a khalh nia sawi a ni a, kawngsira lei nem chin a dai laiin leiin bus a dawl zawh loh avangin he bus hi kawng thlangah a lum a, a lumna hi nikum chul a nih avangin thing leh mau lo dawltu a awm lova, metre 500 vel lai a lum nia sawi a ni.
Home Minister Pu R Lalzirliana’n chhiatna thlenga nunna chan mi 21 chhung te hi sorkar dan dinglai angin cheng nuai 4 \heuha ral an nih tur thu a sawi.
Chetsualna hmun hi Disaster Management & Rehabilitation Minister, Pu C. Ngunlianchunga leh mi pawimawh dangten tukin khan an pan nghal a, Serchhip damdawi ina hliam dah te tlawhin Rs. 1,000/- \heuh a pe a, Minister hian Pangzawl daia motor chetsualna hmun pan lehnghalin Pangzawl Joint YMA hnenah a \ul anga hman turin Rs. 10,000/- a pe bawk a ni. Hemi hnu hian Pu C. Ngunlianchunga hian Lunglei Lunglawna leiminin in a hnawl avanga thi te a tlawh a, mitthi te a ral bakah Joint YMA hnenah \anpuina pawisa a pe bawk a ni.
