Mizoram Governtment Medical Laboratory Technician Association chuan Civil Hospital Blood Bank atanga mimal enkawl damdawi ina hman tur thisen pek chhuah \hinah Unit khat zelah cheng 100 lak an tum tih an sawi. An pawl hotute chuan, mimal enkawl damdawi in-a damlote thisen pek chungchangah hian Sorkar thuchhuak engmah a awm lo chungin Aizawl leh District Hospital hrang hranga Private Hospital-ten Sorkar Blood Bank-a thisen chu an \awmpui reng niin an sawi a. Hemi lo in\anna chu, kum 1992 khan Bawngkawna Greenwood Hospital-a naunei thiput tan Civil Hospital Blood Bank-ah thisen an rawn dil a, heta \ang hian Private damdawi in-te chuan Civil Hospital Blood Bank chu an ring ta vek nia sawiin, tunah hian Aizawl khawpui chhungah ringawt pawh Private damdawi in 15 velin Civil Hospital Blood Bank chu an \awmpui niin an sawi. MGMLTA hotute chuan, Thisen pek chu thil buaithlak tak, engemaw tihsual palh thulha an Service chhiat vek theihna mawhphurhna keng tel a nih avangin an hna piah lam, Private damdawi in tana lo thawh chu an tan a him loh avangin an pawl hruaitute \hukhawm chuan Sorkar Hospital-a an hna bak khawih tawh loh \ha a ti a. Hetih rual hian Durtlanga Synod Hospital bak Blood Bank dang a awm rih loh avang leh damloten harsatna an tawh loh nan Private damdawi ina thisen pek \hin chu chhunzawm ni se, chutih rual chuan thisen Unit khat zelah kut hah man cheng 100 lak ni se an ti niin an sawi. Zawhna chhangin, MGMLTA hotute chuan, thisen sawngbawl man an lak hun tur chu chiang taka sawi theih a la nih loh thu leh an Department hotute berawn chunga thutlukna la siam tur a nih thu an sawi a. He ruahmanna hi an duham vang emaw sum an it vang emaw ni lovin, an mawhphurhna piah lam hna an khawih nasat avanga an kut hah man tura tih a nih thu leh heta \anga an sum hmuhte chu an pawl sum bawma chhun luh vek tur a nih thu an sawi a. Kum 5 vel kalta a\ang khan Lunglei Civil Hospital Blood Bank-a thawkte chuan Private damdawi ina hman tur thisen an pek chhuahin Unit khat zelah cheng 200 an la \hin nia sawiin, tuna an ruahmanna hi a hlawhtling a nih chuan Mizoram pumah Rate inanga tlanga lak a nih tur thu MGMLTA hotute chuan an sawi a ni. Nikum July a\anga December thla thleng khan Aizawl Civil Hospital Blood Bank hian thisen Unit 12,331 a pechhuak a, chung zinga Unit 6,664 chu Civil Hopital-a damlote hman niin, a bak Unit 5,667 private Hospital-a damlote hman a ni.
