Vawiina Aizawl Press Club-a thuthar lakhawmtute an kawmnaah an pawl President, Pu Lalrokima Pautu chuan, Mizoram Electrical Lisence Holder Association chu Firms and Societies hnuaiah mipuite him zawk nana House Wiring dik lo um bo turin nikum October ni 9 khan din a ni tih a sawi a. House Wiring ti \hin chu thiam leh fel tak tak awm bawk mah se, Mizoram Sorkar-in hetiang ti thei tura Lisence pe tura a din, Mizoram Electrical Lisencing Board-in Lisence a pekte bakin House Wiring hi an tithei lo tih hriat a ngai tih sawiin, BE (electrical) emaw JE (Electrical) emaw ITI a Electrician zirchhuak emaw pawh Mizoram Electrical Lisencing Board hnuaia Lisence nei lote chu House Wiring hi tih phal an ni chuang lo tih a sawi.
Pu Lalrokima Pautu chuan, House Wiring tura License neite chu an hnena inziak lut vek turin a sawm a, an hnena inziak lut lote chu an hnathawhnaah harsatna an nei a nih pawhin hmalakpui a theih dawn loh nia sawiin, House Wiring reng reng chu uluk taka tih a ngai a, a chawm tur zat a zira hmanraw hman tur hrang tam tak a awm avangin a thiam lovin an khawih a nih chuan vanduaina thleng palh thei a nih avangin mipuite chu a thiam leh rin tlakte chauh chhawr nachang hre turin a chah a ni.
