CEO thar, Pu Ashish Kundra hian vawiin khan thuthar lakhawmtute kawmin, inthlanna neih tura inpuahchahna hrang hrangte a hrilhfiah a, Tripura Camp-a awm, Bru te Kanhmuna vote thlak tir tura ruahmanna siam hi Political party leh NGO Coordiantion Committee hotute pawh a sawipui tawh tih sawiin anni pawhin \ha an ti niin a sawi. Tripura-a awm mek Tuikuk \henkhat Kolasib District-a Electoral Roll-a thun an nih chungchang chu Jt. NGO Coordination Committee-in High Court-a PIL a thehluh tawh avangin Court thuneihna a nih tawh thu leh Court-in dan ang taka ro a rel tur a nih thu a sawi bawk.
Pu Ashish Kundra chuan, tun thla ni 28-a Mizoram Assembly inthlanpui neih tur atana inbuatsaihna hrang hrang chu ngawrh taka kalpui mek a ni tih sawiin, final electoral roll pawh tihchhuah a ni tawh niin a sawi a. Inthlan chuh tumte tana inhnuhdawh theih hun tun thla ni 14-a a tawp hnuah inthlan chuh tura pawmte chu an vaiin mi 209 an ni tih sawiin, polling party hrang hrangte pawh training pek vek an ni tawh niin a sawi a. Sorkar hnathawk Ballot paper hmanga vote thlak turte tan Postal ballot print mek niin, vote thlakna atana hman tur EVM pawh ruahman fel vek a ni tawh niin a sawi.
Chief Electoral Officer chuan, kum danga la tih ngai loh angin kumina Mizoram Assembly inthlanpui neih turah hian vote thlak hma ni 5 la awmah vote nei zawng zawngte chu an mahni bialtu BLO kaltlangin Phot Voter Slip pek vek an ni dawn niin a sawi a. Mizorama Polling Station 32 chu venhim ngaizual bik, Critical Polling Station a puan a nih thu leh heng hmunahte hian boruak muanawm tak hnuaiah mipuiten vote an thlak theih nan venhimna khauh taka kalpui a ni dawn niin a sawi a. Tunah hian venhimhna thawk turin CRPF Company 20 Mizorama an awm tawh thu leh hei hi a \ul anga ruahmanna siam belh zel theih a nih thu a sawi bawk. Zawhna chhangin CEO chuan, Mizoram Assembly inthlanpui vote thlak hun sawn tura rawtna awm chungchang chu engmah a la sawi theih loh thu sawiin, hemi chungchang hi ECI lam thuneihna a nih thu a sawi a. Hetianga rawtna hi a awm a nih pawhin anmahni lam chuan a hun taka inthlanna neih a nih theih nan theihtawp chhuaha \an an lak mek thu a sawi a ni.
CEO thar hian Mizorama inthlanna muanawm a awm \hin tih mite hriat dan ni \hin chu chhunzawm a, vawn nun zel anih theih nan \anlak a \ul tih sawiin, state dangte entawn tlak khawpa hmalak zel a ngai a ni, a ti a. Tun hma lama thil kal tawhte theihnghilh a, ngaihtuahna thar nei tura mipuite ngenin, inthlanna buatsaih kawnga CEO Office hmalakna chu ring tawk turin a ngen a, eng harsatna mah awm lova inthlan hi buatsaih theih ngei an tum tih a sawi a ni.
Mizoram sorkar-a GAD Secretary hna chelh lai, Pu Ashish Kundra hi Mizoram Chief Electoral Officer thar atan ruat a nih thu nimin khan Election Commission of India chuan thupek a chhuah a. Pu Ashish Kundra hian vawiin khan a hna thar hi zawm nghalin, vawiin vek khan Political party hrang hrang hruaitute leh Joint NGO Coordiantion Committee hruaitute kawmin, Mizoramah inthlanna tluang leh felfai taka neih a nih theih nana \anlakpuiah sawmin, hetah hian pawl hrang hrang hruaitute chuan inthlanna thianhlim leh felfai a awm theih nan theihtawp chhuaha \anlakpui an inhuam thu an hrilh nia sawiin, hei hi tihhlawhtlin ngei a beisei tih Pu Ashish Kundra chuan a sawi a.
Vawiin tlai dar 4 khan Vedio Conference hmangin District hrang hranga District Election Officer leh Superintendent of Police-te meeting a neihpui a, hetah hian inthlanna neih tur atan inbuatsaihna kalpui dan a sawipui a ni.
