Vawiina Aizawla thuthar lakhawmtute a kawmnaah CEO chuan Tuikuk-te Kanhmuna vote thlak tir an nih tur thu hi nimin khan Election Commission of India-in a tichiang ta tih sawiin, heng mite hian tluang taka vote an thlak theih nan Polling Station 15 siam a ni dawn a, chung zinga 9 chu Kanhmun khelmuala siam tur niin, a bak Polling Station 6 chu Kanhmun Inndor Stadium-a siam a ni dawn a, Mizorama District pathum Mamit, Kolasib leh Lungleia vote neiten vote an thlak vek theih nan ruahmanna siam a ni ang a ti a, Tripura a\anga Kanhmuna Vote thlak turte kal leh haw lam buaipui dan tur chungchang zawhna chhangin he thilah hian ECI a\anga thutlukna an la dawn loh thu a sawi.
Pu Ashish Kundra chuan, Kanhmun-a polling station hrang hrangah te hian Tuikuk-te vote neihna district pathuma District Election Officer-ten Polling duty turte chu an ruahman dawn a, Sector Magistrate leh Booth Level Officer-te chu zaninah emaw naktuk zingah emaw an duty-na hmun tur thleng tura a beisei an ni a ti a, vote neite hnenah naktukah emaw a tukleh lamah emaw chuan Photo voter slip pek hman beisei a ni tih a sawi.
CEO chuan, Tuikuk-te vote thlakna tur Kanhmun hi tunkar thawhlehni khan Election Department Officer leh Police hotute nen an tlawh tih sawiin, helai hmunah hian nilaini a\ang khan a mawhphurtu tura ruat Officer-te chuan hna an thawk \an a, vote thlak a nih hma chu a hmunah an \hutchilh dawn tih a sawi. Kanhmun a tlawhnaah hian Tripura sorkar hotute, North Tripura District DC leh SP bakah mipawimawh dangte nen tluang taka vote thlak a nih theih dan tur an sawi ho tih CEO chuan a sawi a, Tuikuk hruaitu a kawmten an Camp-a vote thlak an duh thu an lo thlen chu Mizo mipuite duh danin an vote neihna hmun Mizoram chhung ngeia vote thlak tir an nih tur thu leh an vote thlakna hmun atan pawh Kanhmun ruat a nih thu a hrilh nghal niin a sawi. Tuikuk-te vote thlakna hmun tur Kanhmun khawtlang hruaitute leh tlawmngai pawl hruaitu pawh a kawm thu leh an khuaa Tuikuk-te vote thlak tir tum a ni chu an thlawp thu leh boruak muanawm tak hnuaia vote an thlak theih nan \anlak an tum thu an hrilh niin a sawi.
Zawhna chhangin CEO chuan, Candidate zinga thubuai neite chuan tualchhung chanchinbu lianah thubuai an neih thu vawi 3 tal an chhuah tur a ni tih Supreme Court thupek chu candidate ten an zawm vek theih nan nimin khan Political party hrang hrang hotute a sawipui tawh tih a sawi a, hei hi zawm lo an awm a nih chuan an thubuai neih dan zirchianga hmalak zui a nih tur thu a sawi. Tun hnaia Joint Chief Electoral Officer, Pu Zorammuana sawn a ni chu sorkar huang chhunga insiamremna satliah a ni tih sawiin, tunhma chuan CEO chu Joint CEO ten an pui \hin a, tunah chuan Addl. CEO atan IAS Officer an awm tawh avangin hetiang thutlukna hi siam a ni a ti.
