Mizoram bakah hian Rajasthan, Madhya Pradesh, Telangana leh Chhattisgarh-a inthlan neih tur chungchang vawiin chawhnu dar 3 khan Chief Election Commissioner of India, Pu Om Prakash Rawat chuan New Delhi-ah a puang a, inthlan puan a nih rual hian heng state hrang hrangah hian Model Code of Conduct pawh hman nghal a ni. State dang 4 ruala Mizorama inthlanpui neih tur leh inbuatsaihna hrang hrang kalpui dan Chief Election Commissioner of India, Pu Om Prakash Rawat-a’n New Delhi-a a puan hnu tlai dar 4 khan Mizoram Chief Electoral Officer, Pu SB Shashank chuan thuthar lakhawmtute a hrilhfiah a. Mizoram Assembly inthlanpui neih tur hriattirna chu November ni 2-ah tihchhuah a ni dawn a, November ni 9 thleng inthlan chuh tumte tan hming pek leh thei a ni dawn a ni. Heta hming lutte chu November ni 12-ah endik a ni ang a, inhnukdawk leh duhte tan November ni 14 thleng inhnuhdawh theih hun hawn a ni ang a. November ni 28-ah vote thlak tur niin, vote tla te chu December ni 11-ah chhiar a ni dawn a ni.
Pu SB Shashank chuan, Mizoram Assembly bial zinga 39 chu Reserved Constituency a puan niin, bial pakhat Aizawl East I chu Un-reserved Constituency a puan ni tih a sawi a, a pumpuiah Polling Station 1,164 siam turin vote thlakna khawl, Electronic Voting Machine (EVM) hman a ni ang a, Mizorama a \um khat nan Voter Verifiable Audit Trial (VVPAT) 1,751 hman a ni dawn tih sawiin, venhimna pawh khauh taka kalpui tur a ni a, Mizoram Police Company 48 leh Central Armed Police Company 40 duty tir an ni dawn a, kumin inthlanpui neih tura thil thar hman tur zingah Polling Station thlan bik 125-a vote thlak lai chu Live-a pekchhuah a ni dawn a, Mizoram Assembly inthlanpui neih tur atana Final Electoral Roll chu September ni 27 khan tihchhuah a lo ni tawh a, hetah hian vote nei mi 7,68,181 an awm tih a sawi a, inthlan puan a nih tak avangin Model Code of Conduct hman nghal a ni tih a sawi bawk.
Mizoram Sorkar Flagship Programme NLUP chu Model Code of Conduct-in a huam tel leh tel loh zawhna chhangin Pu SB Shashank chuan, zirchian a nih phawt loh chuan a hriat mai loh thu a sawi a. Hetihrual hian mipui vote hipna atana hmalakna thar ang chi reng reng chu khap vek a ni tih a sawi.
