Campaign theih hun chhung a tawp tak avang hian Political Party hrang hrang leh anmahni campaign puitute chu campaign an chhunzawm danin a phal tawh lova, hemi rual hian electronic media leh print media hmanga campaign, vantlang inkhawm buatsaih leh a huhova punkhawm te pawh phal a ni tawh lo a ni. Bial hrang hranga candidate te campaign puitu bial danga awm te pawhin an awmna bial ni lo bial danga an campaign-na bial an chhuahsan a ngai a ni.
He inthlannaa hmun hla duty tur Polling party 176 te chuan vawiin khan an duty-na hmun tur polling station an pan ta a, heng zingah hian Lawngtlai District leh Mamit District-a khaw \henkhat, kea kal ngaite pawh an tel a ni. Vawiina chhuakte hi Aizawl District-ah chuan Tuivawl biala polling station 15 leh Chalfilh biala polling station 13-a duty tur te an ni a, Lunglei District-ah pawh Thorang biala polling station 13-a duty tur leh West Tuipui biala polling station 3-a duty tur te pawh an chhuak a, heng mite bakah hian Tripura Bru Relief Camp-a awm Lunglei District mi, Kanhmuna Temporary Polling Station-a duty tur polling party 3 an tel bawk a ni. Khaw hla leh kal harsa tamna Lawngtlai District-ah chuan Tuichawng biala polling station 59-a duty tur te, Lawngtlai West biala polling station 32-a duty tur te leh Lawngtlai East biala polling station 13-a duty tur te an chhuak a, Siaha District Palak biala polling station 25-a duty tur polling party te pawh an chhuak a ni. A bak polling station 1,176-a duty tur polling party te chu naktukah chhuah tir an ni dawn a, heng zingah hian Aizawl khawpui leh District khawpui danga duty tur leh khaw hnai leh kal awlsama duty tur te an tel a, Tripura Bru Relief Camp-a awm Mamit District mi leh Kolasib District mite tana Kanhmuna temporary polling station siama duty tur te pawh naktuka chhuak tur zingah hian an tel a ni. Kanhmunah hian Tripura Bru Relief Camp-a Tuikukte vote thlak nan temporary polling station 15 siam a ni a, heng zinga pakua chu Mamit District mite tan a ni a, pathum ve ve chu Kolasib leh Lunglei District mite tan a ni. Tun \uma Mizoram Assembly inthlanna neih turah hian polling station pangngai 1,164 bakah temporary polling station 15 Kanhmunah siam a ni bawk. District hrang hranga polling station 1,164 zinga 32 te chu polling station ven uluk ngai zual an ni a, Kanhmuna temporary polling station siamte pawh hi \ha taka vil tur a ni bawk ang.
Boruak \ha leh ralmuang tak hnuaia inthlanna neih a nih theih nan venhimna hnathawk turin Central Armed Police Force (CAPF) company 40 chah luh a ni tawh a, an ni bakah hian Mizoram State Armed Police company 24 leh silai keng lo chi Police company 19 duty tura ruahman a ni.
