He Session programme kimchang hi vawiin khan Assembly Speaker, Pu Lalrinliana Sailo kaihhruaiin duan a ni a, kumin April/May thla vela Parliament inthlanna neih a nih dawn avanga Lok Sabha-in Interim Budget chauh a pass avangin he Session-ah pawh hian sorkar kumthar thla 3/thla 4 vel chhung hman tur Vote on Account a pass a ni ang a, Vote on Account leh kumin sorkar kum chhunga sum indaihlohna phuhrukna tur, Supplementary Demand for 2018-2019 chu tun thla ni 19-ah Chief Minister, Pu Zoramthanga, Finance Minister ni bawkin a pharh dawn a ni.
Session \anni hian House-ah Larsap, Pu Kummanam Rajasekhara’n thu a sawi ang a, hemi ni hian Larsap thusawi vanga lawmthu sawina Motion put luh nghal a ni ang. A tuk, ni 13-ah chuan hun hmasa chu Member hlui, kumin January ni 11-a Lawngtlai a thi, Pu F Manghnuna sunna neih a ni ang a, hemi hnu hian zawhna leh chhanna bakah House-a Larsap thusawi sawihova pawmpui tum a ni ang. A tuk, Ninganiah zawhna leh chhanna bakah sorkar thil pawimawh ngaihtuah a ni ang a, a tuk leh, Zirtawpni chu zawhna leh chhanna bakah Private members business atan hman a ni ang. Inrinni leh Pathiannite chawlhsan a nih hnuah ni 18, Thawh\anni-ah zawhna leh chhanna, Finance Committee siam leh sorkar thil pawimawh tih a ni ang a, a tuk ni 19-ah Supplementary Demand for 2018-2019 leh Vote on Account pharh a ni ang a, ni 20-ah Vote on Account pass a ni ang a, tih tur dang awmte ti zovin Session tih tawp a ni ang.
