Mizoram Assembly Budget Session chu vawiin khan \an a ni. Session \an a nih veleh House-a thu sawiin Mizoram Larsap, Lt. Gen. Nirbhay Sharma chuan sorkar hmalakna leh hlawhtlinna te a tarlang a, chung zingah chuan New Economic Development Policy hnuaiah Rs. 10,27,00,00,000/- senga hmasawnna tura kawng hrang hranga hmalak a nih thu te, nikum November ni 29-a Aizawl tlawha lo zin, President, Pu Ram Nath Kovind-an mi rethei chhungkaw 1,096 chenna tur in sak thar a hawn thu te, faina leh thianghlimna kawnga hmalak dan te, NLUP chu kum 5 chhung hman tura duan nimahsela, vawiin thlenga chhunzawm a nih thu te, kawlphetha siam chhuahna lamah Mizoramin nasa taka hma a sawn thu te sawiin, Tuirial Hydel Project kawlphetha mega watt 60 pe chhuak thei tur chu kumin sorkar kum, 2017-2018 chhungin zawhfel tum a nih thu te a sawi a, Tuivai Hydel Project kawlphetha mega watt 210 pe chhuak thei tur siam turin NEEPCO nen inremna thuthlung siam a nih tawh thu a sawi bawk. Thingtlang lama Swachh Bharat Mission tih hlawhtlinna tura hmalak dan sawiin Larsap chuan Aizawl, Champhai, Kolasib leh Serchhip District te chu ekin ni lo, pawnlama inthiar awm tawh lohna District-ah puan an lo ni tawh a, Siaha leh Mamit District te pawh puan theih thuai tura hmalak nan hman mek niin a sawi a, hemi bakah hian Lawngtlai leh Lunglei District pawh tun thla tawpah chuan pawn lama inthiar awm tawh lohna District-ah puan theih tum niin a sawi bawk. Mipuite ei tur buhfai \ha tawka chhekkhawl a nih thu te, zirna siam \ha tura hmalak dan te, kum 2017-2018 zirna kum a\angin pawl 6-a chin chunglamah inzirtir nan sap \awng, english hman a nih thu te a sawi a, Mizoram chhunga kawng thar siam tur te, kawng awmsa siam \ha tur te leh lei dawh kawngah te sorkar chuan nasa takin hna a thawk niin a sawi bawk. Larsap chuan House Member te chu anmahni rorel tura thlangtu mipuite laka an mawhphurhna hre renga sum dik tak leh langtlang theia hmang turin a ngen bawk a ni. Larsapin thu a sawi zawh hian Pu H. Zothangliana MLA chuan lawmthu sawina motion a pulut a, hei hi Congress Member, Pu RL Pianmawia’n a thlawp hnuah naktuka sawiho turin Speaker, Pu Hiphei chuan a dah ta a ni. Larsap thu sawi zawh hnu hian Speaker, Pu Hiphei chuan tun \um Session programme tur Business Advisory Committee-in a lo rel tawh chu House-ah a pharh a, hei hi House chuan lungrual takin a pawmpui a ni. Speaker chuan he Session chhunga Panel of Chairman tur a puang a, chungte chu Congress Member 2, Pu Nihar Kanti Chakma leh Pu T. Sangkunga, MNF Member 2, Pu Lalruatkima leh Pu Lalrinawma te an ni. Session hi vawiin atan Speaker chuan vawiin chawhma dar 10:59 khan a titawp a ni. Naktuka Session chhunzawm leh a nih chuan hun hmasa chu tun hnaia member hlui thi ta, Pu Lalchunga Chinzah leh Pu J.Kap\hianga te sun nan hman a ni ang a, hemi hnu hian zawhna leh chhanna lak a ni ang a, chumi hnuah House-a Larsap thusawi sawihova pawmpui tum a ni ang.
Zonet correspondent sawi danin Larsap hi Session \an hun zing dar 10.30 rik hma minute 4 velah House ah hian a thleng a, House Leader Pu Lal Thanhawla tiamin Member \hahnem takin house chhung an la lut hman lo a, larsap hian a sana hman dik loh palh vang a nih thu sawiin, member te hriatthiamna a ngen a ni.
