Hemi bakah hian Court chuan Pu Lalhmingliana hi Rs.11,00,000/- chawi turin a ti bawk a ni. He thu hi Business Standard nimina chhuakin a tarlang a, a thudawnna pawh PTI report a ni tih a sawi tel bawk a ni. He inbumna thubuai hi Special CBI Judge, NK Malhotra-an Indian Penal Code leh Prevention of Corruption Act tlawh chhanin a ngaihtuah a, a chunga thutlukna siam Delhi High Court-a a khinlet theih nan CBI Court chuan
statutory bail a phalsak a ni. Inbumna chungchanga Pu Lalhmingliana thubuai ngaihtuahtu Court chuan November ni 29 khan Pu Lalhmingliana hi thiam loh a chantir a, a thutlukna hi November ni 30 khan a puang a ni. Court thuchhuak tarlan danin Pu Lalhmingliana hian a computer-in thlawhna ticket lem kum 2012-2013 chhunga hman turin a siam a, chumi hmang chuan Rajya Sabha Secretariat-ah TA bill dik lo Rs.11,19,926/- senna nia sawi a thehlut a, hemi hmang hian Rajya Sabha Secretariat chu Rs.10,36,533/-in a bum a ni. MNF Party mi, Pu Lalhmingliana hi kum 2008 a\anga kum 2014 thleng khan Rajya Sabha member a ni a, he thil dik lo chungchangah hian kum 2015 August thla khan IPC leh Prevention of Corruption Act tlawh chhanin Court-ah thubuai siamsak a ni a, he thilah hian Pu Lalhmingliana hian thil dik lo a ti lo niin a sawi a, CBI Prosecutor, Jyotsna Sharma Pandey chuan Pu Lalhmingliana hian upa tawh leh natna chi hrang hrang nei nia a insawi avangin a nep thei ang bera hremna pek niin a sawi a ni.
