Mizo Zirlai Pawl chuan Bairabi Zophaia Zofate Chawlhbuk sak an tum chu dodalna karah tihpuitlin tumin an bawhzui zel. Assam Police ten sak phal lova nimina an dodal hnuah MZP hruaitute hian an President, L. Ramdinliana Renthlei hovin helai hmun hi an chamchilha, tukin khan Mizoram sorkar aiawhin Chief Minister Political Adviser, Pu Lalrinmawia Ralte, Kolasib Bawrhsap, Pu R. Zarzosanga, Additional Home Secretary, Pu Lalbiakzama, Kolasib SP, Pu Abhishek Dhania leh sorkar officer dangte chuan MZP hruaitute hi Bairabi PWD Rest House-ah an thil tum chungchang sawipuiin bansan tawh turin an ngen a, ramri buai hi Mizoram sorkarin DC Level leh Chief Secretary Level-ah chingfel tura bawhzui a tum thu an hrilh a ni. Hemi chungchang sawihonaah hian MZP hruaitute chuan an thutlukna lo siam tawh chu anmahni maiin an \hiat thei lo tih sawiin, an pawl hruaitu dangte nen inbiakrawn phawt a ngai tih sorkar aiawhte chu an hrilh a, hemi hnua inbiakrawnna an neih leh hnuah an thil tum chu bansan lova bawhzui zel turin thutlukna an siam ta a ni. Bairabi PWD Rest House-a an inbiaknaah hian MZP hruaitute chuan Mizoram leh Assam inkar ramria Inner Line Reserve huam chhungah ramri buai chinfel a nih hma chuan Assam lam leh Mizoram lamin engmah ti lo se, thil awmdan chu engkim a ngaiin dah rih ni rawh se tih a nih laiin Assam lamin thil thar tam tak an ti a, chung zingah chuan Police Beat Post leh Police Barrack thar siam te, School din te, thil thlirna Watch Tower sak te leh thildang tam tak an ti tho nia sawiin, Mizoram lamin thil engemaw tih ve an duh dan a ni si chu an hriatthiam loh thu an sawi a ni. Hemi chungchang sawihonaah hian Bairabi Joint YMA President, Pu PB Lalnunmawia, Bairabi North VCP, Pu K. Lalchhuanawma, South VCP, Pu H. Zirsangliana, Bairabi North leh South Branch YMA President leh Zampuimanga Group YMA President te an tel a ni. Hemi hmalam, nizan khan MZP hruaitute leh Member Bairabi Zophaia riakte hi Central YMA aiawhin Assistant Secretary, Pu Peter Chhakchhuak, CEC Member, Pu Lalbiakzuala, President hlui, Pu Vanlalmuana leh Pu HF Lalrinpuia ten an tlawh a, ram leh hnam humhalh chu YMA thil tum a ni tih hrilhin an hmalakna an thlawp thu an hrilh bakah \anpuina an pe bawk. Central YMA hruaitute hi vawiin khan Aizawlah an lo let leh tawh a ni. Home Minister, Pu R. Lalzirliana’n ramri-a buaina a awm reng rengin Congress kaihhruai Sorkar chuan a tih tur a la ti zel tih vawiina Congress Bhavan-a inkhawmah a sawi. Home Minister chuan, Mizoram leh Assam ramri siamfelna hun \ha ber chu MNF leh India Sorkar-in inremna an ziah dawn lai kha niin a sawi a, khatihlaia MNF hote khan lal an duh luat vangin ramri hi vawiin thlengin chinfel lohvin a awm phah ta niin a sawi.
Zoram Peoples’ Movement ZPM Val Upa Council Chairman Pu Lalfakzuala’n Assam leh Mizoram ramri chungchangah congress leh MNF te chu an kut phuar tlat nia sawiin ZPM chu ramri chungchanga hma la thei awmchhun niin a sawi. Vawiina Aizawla chanchinbumite a kawmnaah Mizoram Chief Secretary hlui Pu Lalfakzuala chuan kum 1986-a India sorkar, MNf leh Mizorama Congress kaihhruai sorkar dinglai ten remna thuthlung an zoiahah a hma zawnga zofate pawm theih ngai loh Vairengte kaltlang ramri, barluih ramri chu pawm a ni a ti a. Hei vang hian Congress leh MNF te chu ramri chungchangah an kut phuar a ni a, ZPM a sorkar chuan ramri chu a bawhzui dawn a ni a ti. Pu Lalfakzuala chuan kum 1994 February thlaa PWD ten Vairengte daia kawng an laih, Assam Police leh Forest lamten an tihbuai avanga State pahnih inkara inepna boruak \ang tak a chhuah \um khan ramri chungchanga inbiakna thui tak neih hman a nih thu a sawi a, Commissioner levela inbiakna neih a nih hnuah Chief Secretary levela inbiakna neih leh a ni a, Chief Minister levela inbiakna nei tura thu dah chu vawiin thlengin neih a ni ta lo tih a sawi. Pu Lalfakzuala chuan kum 1995 chho, Chief Secretary a nih laiin tuna ramria buaina chhuahna hmun Zophaia leilette chu Mizoram chhunga ngeia mi a ni tih finfiah a lo ni tawh niin a sawi a, Police Outpost thar siamin a hmingah Zophai Outpost tih vuah a ni a, Police te pawh ramri venghim tur leh a tul anga che tura hriattir an ni a, rei tak chhung chu buaina pawh awm lo zui a ni a ti a, tuna \henawm state ten Zophai an rawn chuh ngam leh ta te, Mizoram sorkar leh Police an che lo te chu mak a tih thu sawiin, Mizoram sorkar chuan Zophai chu Mizoram chhungah a ngai ta lo em ni tih a zawt a ni. Amah \awiawmtu ZPM Val Upa Council Vice Chairman Pu F Lalremsiama, IPS (rtd) pawhin ramri buai chungchangah hrui khat vuana kal a \ul a tih thu a sawi. Bairabi Zophai a ram leh hnam tana ding Mizo \halaite Assam Police ten kut an thlak laia Mizoram sorkar thuneitute an ngawi tlat chu an dem hle tih MNF Sr. Vice President Pu Tawnluia’n a sawi. He thu hi vawiina Mizo Hnam Run inkhawmah a sawi a, Assam Police ralthuam keng ten Mizo zirlai leh \halai rualte kut an thlak laiin Mizoram sorkarin a ngaihsak duh lo niin MNF sr Vice President chuan a sawi a, he thil thleng chungchangah hian MNF chu a ngawi mai mai dawn lo a ni a ti. Pu Tawnluia chuan, MNF sorkar laia an din IR battallion 4 te chu tun ang huna hman tura buatsaih an ni a ti a, Bairabi a Mizo Hnam hnatlang a tel turin an party MLA Pu K Sang\huama leh Dr K Beichhua te bakah hruaitu engemawzat an thawk thla tih a sawi bawk. Inkhawm hi MNF Adviser Pu Liansuama’n a kaihruai a ni. Assam Police in Mizoram chhunga Mizo zirlai leh chanchinbumi te kut an thlak chu Mizoram Joint Action Committee on Inner Line Reserved Forest Demand in an ngaihthiam loh thu vawiin khan thuchhuah siamin an sawi. Inner Line Reserved Forest Demand JAC chuan, a ram neitu zawkin kut an tawrh laia chhantu neilo ang maia Zirlai te an awm chu pawi an tih thu an sawi a, Mizoram chhunga Assam sorkarin CRPC 144 a puang pawh an ngaihthiam loh thu sawiin Mizoram chan Inner Line Forest Reserved Mel 509 biala zau an enkawl mek neih hlen tuma an chet dan chu a \ul ang a khin zel an tum thu an sawi. Inner Line Reserved Forest Demand JAC chuan, Pu Ch. Chhunga leilet-a MZP ten Zofate chawlhbuk sak an tum chu \ha an tih thu leh an thlawp thu an sawi a, hetihlaia Assam sorkar na taka a chet laia Mizoram sorkar a ngawi tlat chu awm lo an tih thu an sawiin, ramri chungchangah hian Political Party tin te chu pawl ham\hat lak tum lova \angrual tura an duhthu an sawi bawk. MPCC President, Chief Minister Pu Lal Thanhawla’n ramri buaina chu pawl emaw mimal thahnemngaihna emaw hmanga chinfel mai chi a ni lo tih a sawi a. He thu hi vawiina Congress Bhavan-a inkhawmah sawiin, MZP-in thahnemngaih thila hma an lakna vanga buaina an tawk chu pawi an tih thu leh, buaina nasa zawk a chhuah loh nan nizan khan Chief Minister Political Adviser, Pu Lalrinmawia Ralte leh Sorkar Official-te Bairabi lamah tirh nghal an ni tih a sawi. Pu Lal Thanhawla chuan, tun hnaia \henawm State 3-a inthlan Result chuan Mizoramah nghawng pakhatmah a nei lo tih a sawi a. A kaihhruai Mizoram Pradesh Congress Committee chu engtiklai mahin Central lama Congress chaknaah a innghat ngai lova, Pathian rinchhantu a nih avangin eng hmachhawn turin an inpeih thu leh tute emaw anga midang chhaknaa innghat an ni ve lo tih a sawi. Chief Minister chuan, tun hnaia \henawm State 3-a inthlanpui neih zawh takah khan mi\henkhat chuan sum leh pai hmangin nasa takin hna an thawk tih a sawi a, he Result hian Mizoram chu engtikawng mahin a nghawng ve loh tur thu sawiin, Politics kan khel a nih pawhin ngheh tur a ni a. tute emaw anga BJP zawm duh si, a taka zawm lang ngam si lova, an zawmpui NEDA vela tel kual chu thil tih chi a nih loh thu a sawi bawk. He inkhawm hi MPCC General Secretary Pu Benjamin Thansanga’n a kaihruai a, AH&Vety Minister, Pu C. Ngunlianchunga’n thu a sawi bawk.
