ZNP President, Pu Lalduhoma’n Mizo-te chu hnam dangin an chim ral loh nan tam phawt a ngai niin vawiina an party pisa-ah thuthar lakhawmtute a hrilh a, ram hrang hranga hnam tam tak chim rala an awm nachhan chu an tam tawk loh vang nia sawiin, chhiarpui hnuhnung ber, kum 2011 khan Mizoramah mi 10,91,014 an awm nia chhinchhiah a ni a, ram pumah Arunachal Pradesh tih lo-ah chuan Mizoram hi mihring tlemna ber a nih thu a sawi a. Kum 10 chhung, kum 2001 atanga 2011 thleng khan Mizorama mihring punna chu za zela 22.78 vel chauh a nih avangin Mizorama Family planning bawhzui a nih dan chu thil tihsual lian tak a ni tih a lang niin a sawi a, Mizorama mihring pun dan atanga chhut chuan MP 1 aia tam neih theih a la beiseiawm loh hle ni tih a sawi. Pu Lalduhoma chuan, zirna lamah pawh state hrang hranga seat neih theih zat chu mihring tam lam atanga chhut a nih tak zel avangin tun hnaiah pawh tun hmaa Mizoramin MBBS seat a neih thin chu tihtlem niin a sawi bawk.
