Hemi hnua thuchhuah an siamah MSU chuan Land Revenue & Settlement Department-in Data Entry Operator MR Post riat hnawhkhahna tura hnathawktu tur lakna atan tun thla ni 9 khan Personal Interview nei turin mi 18 koh an ni a, heng mite hian result an nghah mek laiin tun thla ni 23 khan midang 6 chu Personal Interview tura koh an ni leh a, hei hi MSU chuan DP&AR Recruitment Rules kalha thil tih nia sawiin an deptt. enkawltu Minister, Pu R. Romawia chu thil awmdan zawhfiah an tum a, amaherawhchu, Minister hian anmahni a hmu thei lo niin an sawi a ni. MSU chuan interview tura koh thar te tihtlin an nih chuan a tawp thlenga do an tum tih an sawi bawk a ni. Hemi bakah hian MSU chuan, Lump Sum Aided Higher Secondary School 9 ten dinhmun sang zawk phut vanga hun rei tak school an khar leh zirlaiten zirna an chhunzawm thei lo chu pawi an tih thu an sawi a, chingfel thuai turin sorkar an ngen bawk a, National Institute of Technology-a zirtirtu Dr. Bijayananda Mohanty thil tih dan chu a dik lo nia sawiin, Dr. Mohanty hian Mizoram a chhuahsan thuai theih dan tur an ngaihtuah zel dawn niin an sawi bawk.
