Mizo National Front Sorkar thar, Pu Zoramthanga kaihhruai, Minister 12 awmna chu vawiin chhun khan Raj Bhavan tuala inkhawmah lakluh a ni. Lakluhna inkhawma Larsap lo thlen veleha Hnam hla, National Anthem sak a nih hnuah Mizoram Kohhran Hruaitute Committee Chairman, Rev. R. Lalhmingthanga, Synod Moderator ni bawk chuan Bible chhiarin sorkar thar lakluh tur Pathian hnenah a hlan a ni.

Hemi hnu hian Chief Secretary, Pu Arvind Ray chuan ram danpui tlawh chhana Chief Minister thurawn pek anga Minister ruatna lehkha a chhiar chhuak a, hemi hnu hian Chief Minister a\anga \anin ram danpui hnuaia rinawmna thu leh sorkar thuruk vawn\hatna tur thu Larsap, Kummanam Rajasekharan-an a tiam tir a, Minister te hian Mizo \awng vekin rinawmna thu leh sorkar thuruk vawn\hatna tur an tiam a ni. Chief Minister Pu Zoramthanga leh Deputy Chief Minister, Pu Tawnluia te bakah Cabinet Minister dang 4 leh Minister of State, Independent Charge 6 lakluh an ni.

Chief Minister leh Deputy Chief Minister bakah Cabinet Minister dangte hi Dr. R. Lalthangliana, Pu Lalchamliana, Pu R. Lalzirliana leh Pu C. Lalrinsanga te an ni. Hrangturzo bial a\anga thlantlin, Speaker hlui Pu Lalchamliana hi Mizopa inchei dan dik takin a inchei a, diar \ial khima puan venga ipte pui ak bawkin rinawmna thu leh sorkar thuruk vawnna tur thu a tiam a ni.

Minister of State Independent Charge 6 te hi Pu K. Lalrinliana, Pu Lalchhandama Ralte, Pu Lalruatkima, Dr. K. Beichhua, Pu TJ Lalnuntluanga leh Pu Robert Romawia Royte te an ni.

Rinawmna thu an tiam zawh hnu hian Leprosy Mission Choir-in Halleluiah Chorus mawi takin an rem a ni. Hemi hnu hian Minister thar lakluhna inkhawm chu tihtawp zui a ni a, he inkhawma tel tura sawmte chuan Raj Bhavan tualah thingpui an in ho a ni.