Mizo National Day hi kum 1966, March ni 1-a MNF-in Independent a puan nia hman \hin nimahse kumin hian March ni 1 kha Chapchar kut ni a nih avang leh a tuk ni 2 leh tuk leh ni 3 te chu sorkar pisa chawlh a nih avangin vawiin khan an hmang ta a ni.
A hmanna inkhawma Hnam Runa neiha thusawiin MNF President, Pu Zoramthanga chuan Pathian rawngbawla amah \ihna nen hna thawh a nih chuan Mizote an dingchhuak dawn niin a sawi a, chu chu a kaihhruai sorkar thiltum niin a sawi bawk.
Pu Zoramthanga chuan Mizo National Movement chu a ral theihna khawp harsatnain vawi tam tak nuai mahsela a dam khawchhuak a, a chhan ber chu Pathian rawngbawl tum tlattute movement a nih vang niin a sawi a, Mizo Nationalism tihchhiat vek tuma sipai an lo chhuah takah chuan MNF-in kawng dang a nei ta lo a, chuvangin zalenna sual turin anmahni leh anmahni inphelhin zalenna atan an inpe ta niin a sawi. Sorkar laipuiin pass a tum Citizenship Amendment Bill pass lo tura Union Home Minister, Pu Rajnath Singh a ngen thu leh tun hmalam khan Mizoram chu India rama awm ngai lo, ‘excluded area’ a nih thu te, British-in Mizoram an chhuahsan dawnin Mizote chu India rama tel zel nge an duh, Burma zawm tih te, East Pakistan, tuna Bangladesh ni ta lama beh nge Crown Colony-a awm nge, independent-a awm an duh tih te zawh an nih laiin ngaihdan insual a awm a, Bristish an chhuah hnuah an tel ve lohna India Constitution chu Mizote barhluih an ni ta niin a sawi a, kum 1966-a zalenna an sual chhan kha hei hi a ni tih a tarlang bawk.
Pu Zoramthanga chuan Aizawla Assam Rifles Battalion Hqrs. chu kumin May thla tawpah Zokhawsanga hmun tharah sawn an ni dawn tih sawiin, an awmna tur in sak zawh vek hnuah pawh Congress sorkar khan Assam Rifles te chu an nawr chhuak thei lova, MNF sorkar hnu thla hnih emaw lek chhungin nawr chhuah na tur thupek siam a ni ta niin a sawi a ni.
He inkhawm hi an party Treasurer Pu Vanlalzawma’n a kaihruai a, hetah hian Martar te zahna leh sunna bakah an party General Secretary, Pu R Lalnunsanga, Ex MNA, Pu Ropianga leh Hav Lalchungnunga te tun thla ni 27-a motor chetsualnaa thi te an sun bawk.
