Mission Antyodaya (Gram Samridhi Evam Swachhata Pakhwada) hnuaia hnathawh dan chu vawiin khan Rural Development Minister, Pu R. Lalzirliana hovin Assembly Conference Hall-ah thlir ho a ni a, hemi hnuaia hnathawk tha, Block leh District-te chu lawmman pek an ni. Pu R. Lalzirliana chuan, tun hma lamah BPL chhungkuate tan a thlawna thil sem leh man tlawm zawka thil an lei theihna tur ruahman thin a nih avangin mahni thawh chhuah phu lova hamthatna dawn pawi ti lo leh BPL nih duh an awm thin a, tunah chuan hetiang rilru hi mipuiten an tlansan mek a, BPL chhungkua nih zahthlakzia an hre chho mek niin a sawi. Mission Antyodaya hi kum 2022-ah India ram hi mi rethei awm tawh lohna rama siamna tura Rural Development Ministry ruahman a ni a, kum 2019 ral hma ngeiin ram puma thingtlang khaw 50,000 thlan chhuahte chu BPL awm tawh lohna a siam tum a ni a. Mizoramah chuan Rural Development Department hnuaiah hei hi khaw 183-ah bawhzui mek a ni.
