SBI-in cheng 10 thir a kawl mekte hi Strong room-ah dah khawl a ni a, Cheng 10 thir an kawl hi manganpui tham khawpa tam, avaiin tlang nuai 7, sing 1 leh sang 2 zet a ni a, hengte hi 100 zelin an fun hrang a, tuna an kawl sa hi a tam tawh em avangin dahkhawlna tur hmun pawh an nei tawh lo a, a dang dawn belh pawh a harsa tawh tih Bank hotute chuan Zonet an hrilh a ni.
Zawhna chhangin SBI hotute chuan, cheng 10 thir hi dan ang taka RBI-in a pawm a nih thu leh hman theih a nih thu an sawi a, mipuiin hman theih loh anga an insawi\haih avang leh sumdawngten an lak duh loh avangin hman a harsa mai a ni, an ti a. Mipuiin cheng 10 thir an dawn duh miau loh avangin tunah hian cheng 10 thir ringawt cheng nuai 71 hu an kawl mek a, hei hi RBI lamah thawn let theih a nih loh avangin a dah khawlna ringawt pawh a hautak avangin mipuite chu cheng 10 thir hman leh dawn chungchangah chiai lo tur leh RBI-in dan ang taka a pawmpui a ni tih hriaa pawm vek turin an ngen a ni.
Bank-a pawisa thir dah phal loh nia sawi chungchang zawhna chhangin SBI hotute chuan, pawisa thir hi bank-a dah luh phal loh a awm lo a, hetihrual hian pawisa thir reng reng chu mipui hnena virkual tura duan a nih avangin RBI danah mi pakhatin ni khatah cheng 1,000 aia tam dah luh theih a ni lo thung tih an sawi.
SBI hotute chuan, cheng 10 thir tih loh pawisa thir dangte chu tunah hian \angkai taka hman mek a ni tih sawiin, cheng 10 thir hi pawisa thir dang ang tho a nih avangin mipuite chu hnualsuat lo turin an ngen a, tunah hian cheng 10 thir tih loh pawisa thir dang chu kawl sa pawh an neih loh thu an sawi a. State dangah pawh cheng 10 thir hi hman theih reng a nih thu an sawi.
