Pu SP Laldingliana leh Pi Lalhmahruaii te nupa hian quarantine centre-a an awm hun tura ruat ni 14 nimin khan an hmang zo a, chhuahtir an nih hnuah Reiek lam pan tura an inbuatsaih laiin Police te hian an man a. Court-ah hruai an nih hnuin Jail-ah dahluh an ni a, Passport Act leh IPC 188 tlawhchhanin thubuai siamsak an ni.
MZP Sub Hqrs Reiek chuan thu chhuah siamin Pu. S.P Laldingliana te nupa hi an nu lungphun hmang turin February ni 4 khan Reiek chhuahsan in Thantlang, Myanmar an pan tih an sawi a, Pu.S.P.Dingliana hian lunglam thatlohna a neih avangin Hakha, Myanmar leh Kalimyo, Myanmar damdawiin ah an awm reng a, an tum angin an rawn haw hma thei lo a ni an ti.
MZP sawi danin Mizorama lo haw an tum chu Tiau kam, Khawmawi-ah March ni 30 khan an thleng a, ramri khar a nih avangin Khawmawi khuaah hian baihvai takin khawlaiah an riak a ni an ti a, Myanmar sorkarin ramri-a awm a phal loh avangin leh Mizorama an luh theih bawk si loh avangin harsatna an tawk a, ei leh in leina tur pawisa an neih tawh bawk si loh avangin tlangval pakhatin Tiau lui daikai puiin Melbuk ramah a hruailut ta a ni an ti, Melbuk khaw hruaituten eitur leh mutbu te pe in Melbuk ram a thlam pakhatah an riah tir a, Champhai District – thu neitu te beng thlengin Quarantine centre ah dahluh an ni ta a ni an ti.
Mizo Zirlai Pawl Sub – Headquarters Reiek hian an khaw mite hi an lainat hle tih an sawi a, Khawtlang leh Kohhran tana mi thahnem ngai mi pawi sawi lo, mahni sahimna atana mahni ram ngeia an tlan luh hnua hremna na tak pek theihna tur thubuai siamsak an ni chu an lainat hle tih an sawi a, Sorkar chu ngaidama chhuah zalen turin an ngen a ni.
March ni 29 zanah khan Myanmar lama tangkhang laklawh, nunau mi 26 te chu India ram chhungah luh tir an lo ni tawh a. Zirlai tangkhang pahnihin sorkar laipui phalna neia ramri an kan hnuah heng Mizoram mi tangkhang laklawhte hi Tiau leiah an chhuak khawm a, an luh phalna hmuh anih hma hian zan khat Tiau leiah an riak hman a ni.
Kha thil thlen hnu March ni 31 khan Champhai District Magistrate chuan, Myanmar a\anga Mizoram luh phalna India sorkara dil buai tawh lo tura mipui hriattirna a ti chhuak a, Myanmar lama mizo awm mek te pawh hri leng vanga inkharkhipna hlih a nih hma chuan Mizorama luh tum lo tur leh an awmna ngaia cham rih turin a hriattir a ni.
