Zonet zawhna chhangin Home Minister, Pu Lalchamliana chuan Assam Rifles-in operation an neihin Home Ministry thupek ang ni lovin, Ministry of Defence thupek ang zawkin thil an ti \hin niin a sawi a, tuna hmarchhak bial State hrang hrang, Mizoram, Assam, Arunachal Pradesh, Manipur leh Nagaland-ah te he dan tlawh chhana Assam Rifles ten thuneihna sang tak pek an ni hi Home Minister chuan hel pawlte khuahkhirhna dan, The Armed Forces Special Power Act, 1958 nen ngaih pawlh chi a ni lova, he dan hi chu Cr.PC hnuaia dan a ni zawk a ni tih a sawi.
Hemi hmalam hian hmarchhak biala State hrang hrang Mizoram, Assam, Arunachal Pradesh, Manipur leh Nagaland-ah te Ministry of Home Affairs chuan Cr.PC section 41, 47, 48, 49, 51, 53, 54, 149, 150, 151 leh 152 te hmanga Assam Rifles ten an mi man duhte phalna la hmasa lova man leh mi dap an duh te phalna la hmasa lova an dap theihna thupek tun thla ni 19 khan a chhuah tih PTI in a ziah chu India rama chanchinbu lar tak takah tarlan a ni a, amaherawhchu hei hi hman leh rih loh turin Ministry of Home Affairs chuan a ti leh ta niin chanchinbu \henkhatin an sawi bawk.
Hetihlai hian National paper \henkhat chuan he thupek chungchang hi a kaihhnawih State sorkar nen sawiho phawta kalpui tur niin an sawi a, amaherawhchu Mizoram bikah chuan he thupek hman tur leh hman loh tur chungchangah vawiin thleng khan sawihona engmah a la awm lo niin sorkar hotuten an sawi.
