Mizoram Assembly-a member hmeichhe awm chhun, Vanlalawmpuii Chawngthu chu Minister of State atan lak luh a ni. Kum 2014 April thlaa Assembly By-election-a Hrangturzo bial a\anga Congress ticket-a thlan tlin, Nula Vanlalawmpuii Chawngthu chu vawiin chawhnu khan Raj Bhavan Multipurpose Hall-ah Larsap, Lt. Gen. Nirbhay Sharma-a’n rinawmna thu leh sorkar thuruk vawnna tur thu tiamtirin a la lut a ni.
Lak luh a nih hma hian Minister of State atana ruatna lehkha chu Chief Secretary, Pu Lalmalsawma’n a chhiar chhuak a, he inkhawmah hian CM, Pu Lal Thanhawla, Minister dangte, MLA, sorkar officer, tlawmngai pawl hruaitute leh Party hruaitute an tel a ni. Nula Vanlalawmpuii Chawngthu hi Mizoram politician hlun zinga mi, MPCC General Secretary, Pu C. Chawngkunga leh Pi Lalliankimi Sailo te fa 8 zinga a 6-na niin, kum 1979 October ni 8 khan Aizawlah a lo piang a, zirna lamah chuan MA (Political Science) a ni. Mizoram Pradesh Youth Congress Committee-ah President a ni a, kum 2014 April ni 11-a Hrangturzo Assembly biala by-election neihah Congress ticket-in MLA atan thlan tlin a ni a, Mizoram State Commission for Women Chairman a ni mek a ni.
Mizoram sorkara Minister of State pahnih – Pu Lalrinmawia Ralte leh Dr. BD Chakma an ban hnuah Minister of State pahnih lak luh an ni leh ta a, tuna mi leh Nilaini-a Minister of State atana lak luh, Pu KS Thanga hna chanpual hi puan a la ni lo a ni. Pi Vanlalawmpuii Chawngthu hi kum 1987-a Mizoram state sorkar a din china hmeichhe Minister pahnihna a ni ta a, MNF sorkar, Pu Laldenga kaihhruaiah khan Pi Lalhlimpuii chu Minister of State a lo ni tawh a ni.
Minister of State atana lak luh a nih hnua thuthar theh darhtuten an kawmnaah Vanlalawmpuii Chawngthu chuan a hna chanpual tur pek fel a nih hunah theihtawp chhuaha hnathawh a tum thu te, CM, Pu Lal Thanhawla’n hmeichhiate dinhmun a hriat chian avangin amah chu Minister of State-ah a dah nia a ngaih thute a sawi a, hmeichhia zawng zawng aiawhin hma an sawn nana hna thawh a tum thu te a sawi a, Congress sorkar chu \halaite khawvel thar siamsak tura politics-a kawng zau tak hawnsaktu, MLA candidate atana \halai zinga mi 3 telhtu a ni tih sawiin, Minister a nih chhungin ram leh hnam tan rinawm taka hna thawh a tum thu a sawi bawk.
