Prime Minsiter chuan hetianga CRPF te beitu te hian an thil tih man an hmulet ngei dawn a ni a ti a, Union Minister Arun Jaitley chuan Pakistan chu ramdangte pawhin an ensan theihna turin India chuan theihtawp a chhuah dawn a ni a ti. New Delhi chuan Jaish-e-Mohammed hruaitu Masood Azhar-a chu mifirfiak tia UN in a puan theihna tura a hmalakna thlawp turin khawvel ramdangte a lo nawr nghal tawh a, nimina CRPF te beihna hi Jaish-e- Mohammed chuan an tihah an chhal a ni.
US pawhin Pakistan chu mifirfiak pawlte tana tawm rukna hmun him siamsak tawh lo turin a nawr nghal bawk.
Nimina thihchilh bomb tipuaktu hian CRPF Convoy Bus inzui lai beiin a bomb pai a ti puak a, bus hi 78 lai inzuiin CRPF mi leh sa 2500 vel zet convoy ah hian an tel a ni. Jammu and Kashmir Pulwama hmunah Scorpio SUV pakhat chuan puakthei thil a phurh, kg 350 zet nen CRPF te chuanna bus pahnih a su lui chiam a, bomb puak hi a ring hle a, mitthi te taksa bung hrang hrangte chu metre 100 bial vela zauah bomb hian a thehdarh a ni.
