Zonet thudawn danin High Court thupek angin August ni 31 ral hmaa hruaitu thar thlanna nei tur hian MHIP Gen. Hqrs. Coordination Committee in ruahmanna a siam ang a, inthlanpui turin NGO dang sawm tur a ni a, Secret Ballot hmanga nomination siam hun chhung tur pawh Coordination Committee ruatfel turin court hian a dah a, Secret ballot hi Registrar, Firms & Societies emaw, a aiawhin emaw office-ah dahin seal thlap turin thu a pe thung.
Court thupek angin Ballot box hi inthlan ni tur atana ruat thlen hma kar khat tal-ah hawn tur a ni a, a hawn ni hian MHIP Gen Hqrs leh a tira thubuai thehluttu Pi Rohmingliani ten aiawh pakhat ve ve endik tur an ruat thei dawn a ni. MHIP Gen Hqrs Executive Committee in nomination an lo siam tawh pawh an duh chuan an ti danglam thei dawn bawk.
Kumin April ni 17-a MHIP hruaitu thlanna neih turah Secret Ballot hmanga nomination siam chu tihchingpen nia hriain Senior Civil Judge Court, Aizawl ah Pi Rohmingliani, Kulikawn chuan MHIP Gen. Hqrs. khinna a thehlut a, Court hian inthlanna neih tur hi a cancel nghal a, MHIP Gen. Hqrs Coordination Comt. chuan Court-a thubuai inchiah a fel hma leh inthlan \hatna anih hma chuan hruaitu ni mekte chu MHIP hruaina hna thawh chhunzawm turin resolution an siam a, hetihlai hian Sr. Civil Judge Court hian June ni 17 khan MHIP Hqrs. chu \hiatin hruaitute chu MHIP hminga engmah ti zui lo tur leh an seal te pawh thehlut turin a ti a. He thupek hi MHIP Gen. Hqrs. chuan Gauhati High Court, Aizawl Bench-ah an khinglet ve leh a, High Court hian Sr. Civil Judge thutlukna siam hi Thawhlehni khan a \hiat a, MHIP kal zel dan tur thutlukna thar hi siam a ni ta a ni.
