Heng mite hian an Legislature Party hruaitu atan Pu Rashik Mohan Chakma an thlang a, hemi hnu hian Chakma Autonomous District Council-ah sorkar thar Pu Rashik Mohan Chakma kaihhruai an siam thei tih nimin khan Larsap, Pu Kummanam Rajasekharan an hrilh a ni. Hemi rual hian MDC 11 an neih te hming ziahna lehkha pawh Larsap hnenah hian an thehlut nghal a, chutah chuan Pu Rasik Mohan Chakma kaihhruai CADC sorkar thar an siam theih thu an hrilh a ni. Hemi hmalam hian MNF Party General Secretary, Pu TC Pachhunga leh MNF MDC te hian Aizawla Chakma House-ah inkhawm neiin CADC sorkar thar din dan tur hi an ruahman a ni.
Member 20 awmna, Chakma Autonomous District Council inthlanpui nikum April ni 20-a neihah khan MNF Party chuan seat la tam berin seat 8 a la a, amaherawhchu, an MDC pakhat a thih avangin member 7 an nei ta a, hemi avang hian tun dinhmuna CADC-a member awm zawng zawng chu 19 an ni ta a, heng zinga 7 leh Congress member 4 MNF zawm ta te nen tuna sorkar thar siam tum MNF member te chu 11 an ni ta a, an ni bakah hian a lehlamah BJP member 5 leh Congress member 3, an vaiin 8 an awm ta a ni. CADC MNF Legislature Party thuchhuah chuan nikum October ni 29 a\ang khan CADC-a BJP sorkar Pu Shanti Jiban Chakma kaihhruai thlawpna Congress member 7 te chuan an hnukdawk tawh niin sawi mahsela, CADC-a Pu Shanti Jiban Chakma sorkar hi a kal ngaiin a la kal reng a, thlawptu an ngah tawk tawh lo tih hriaa, Pu Shanti Jiban Chakma kaihhruai sorkar hi bang vat turin an phut tih an sawi bawk a ni.
