Meghalaya leh Nagaland Assembly inthlanna atan vote thlak zo fel

Meghalaya leh Nagaland Assembly inthlanna atana vote thlak chu nimin khan zawh fel a ni a, Meghalaya-ah chuan vote nei za zela 67-in vote an thlak nia chhinchhiah a ni a, Nagaland-ah chuan vote nei za zela 75 velin vote an thlak nia chhinchhiah a ni bawk. Vote thlak hi Meghalaya-ah chuan tluang taka zawh fel a ni a, Nagaland-ah erawh chuan hmun thenkhatah buaina a chhuak nual a, Zunheboto district-a buaina chhuakah mi pakhat kahhlum a ni a, midang pahnih an hliam bawk a, polling station panga-ah vote thlak buatsaih that leh a ni ang. Puan tawh angin Nagaland inthlanna atana vote thlak-ah hian polling station 1000 vel chu dinhmun hlauhthawnawma dingah puan a ni a, Police leh Central Armed Police Force lam pawh thahnem tak dah an ni bawk a, State Chief Electoral Officer, Abhijit Sinha chuan Phek District-a Polling Station pathum leh Kohima-a Polling Station pahnih-ah te mi thenkhatin vote thlak tumte an lo dan avang leh, heng mite dodaltute nen an intihbuaina-ah silai an chelek avangin, police lam pawhin silai an hmet puak ve tih a sawi, heng hmun panga-ah te hian vote thlak that leh tur a nih thu a sawi bawk a ni. Meghalaya Chief Electoral Officer, Frederick Roy Kharkongor pawhin Raliang biala VVPAT khawl a chiang lo nia an hriat thu leh an enfiah mek thu a sawi bawk a, vote thlak that tur a nih leh nih loh an la sawi thei lo a ti bawk a ni.