Vawiina Kolasib Diakkawna NPP party office a tlawhnaah he thu hi sawiin, Pu James Sangma chuan hmarchhak biala state hrang hrangte chu MP pahnih khat lek lek nei an nih avangin sorkar laipuiah an tlatlum tawk lo \hin niin a sawi a, member tam zawk neia sorkar laipui hlauh tham khawpa \anrual thiam a pawimawh a ni a ti.
National Peoples Party (NPP) thupuangtu ni bawk Pu James Sangma chuan NPP chu kum 6 leka upa a la ni chungin tunah hian Manipur, Nagaland leh Arunchal Pradesh-ah sorkar siamtute zinga an tel thu leh Meghalaya-ah phei chuan sorkar fung vuantu an ni tih sawiin, NPP chu hmarchhak bial leh Tribal mipuiten inunauna \ha zawka an neih a, hma an sawn theih nan leh Kristian sakhua humhim tura din a nih angin Pathianin mal a sawm tih sawiin Hmarchhak bialah hian hnam peng leh \awng hrang tam tak a awm a, hei hi hma an sawn chak loh chhan pakhat nia sawiin, Pu James Sangma chuan heng hnam peng hrang hrang leh \awng hrang hmangte hian chak zawka hma an sawn theih nan an \anrual a ngai a, hmarchhak bialah kristian sakhua chu sakhaw lian ber a nih avangin hemi hmanga insuihkhawm thiam a, Delhi theng phaka aw neih a \ul tih a sawi bawk. Pu James Sangma chuan, tun hi Kolasib District a tlawh \um khatna a ni tih sawiin, inkalpawhna kawngpui a chhe em em chu pawi a tih thu a sawi a. Hemi chungchangah hian Mizoram sorkar hruaitute dem theih ngawt an nih loh thu leh sorkar laipui a\anga kawngpui enkawlna tur sum tam zawk hailuh thiam a \ul a ni, a ti.
He inkhawm hi Kolasib District NPP Covener, NPP candidate tur ni bawk, Pu John Lalremruata’n a kaihruai a, an Party hruaitu dangte pawhin thu an sawi a ni. NPP hi September ni 29 khan Mizoramah din a ni a, November thlaa Mizoram Assembly inthlannaah chuh ve an tum tih an party President, Pu Conrad Sangma chuan a sawi a ni.
