Mizoram University-a Mass Communication Department buatsaihin ‘Media & Women Empowerment’ tih thupui zirhona National Seminar chu vawiin khan MZU Academic and Seminar Complex Conference Hall-ah tan a ni a. A hawngtu, MZU Vice Chancellor, Prof. KRS Sambasiva Rao chuan, hun kalta lama khawtlang nuna hmeichhiate dinhmun chhe tak thin chu a reh chho mek thu leh hmeichhiate pawimawhna chu mipuiin an hre telh telh tih a sawi a. Hmeichhe dinhmun chawikanna pawimawh ber chu zirna a ni tih sawiin, hmeichhe dinhmun chawikan a nih zel theih nan zirna uar deuh deuh a ngai tih a sawi. Seminar hawnna inkhawm hi MZU Mass Communication Department-a Asst. Professor, Dr. Irene Lalruatkimi, Seminar Convener ni bawkin a kaihruai a. Khawvel hmansawnna thang zelin a ken tel Media hmanga thu thehdarh kawngah fimkhur a tul hle tih a sawi a, Media hmanga thu thehdarhnaah hmeichhiate dikna leh chanvo humhalh thiam a pawimawh thu leh dik lo tak emaw mawi lo tak emaw lantir chu dan hmanga hrem theih a ni tih hriat a ngai tih a sawi. He zirhona hi Women and Child Development Ministry duhdana siam niin, ram chhung zirna in hrang hranga zirlai leh mithiamte an tel a, naktukah chhunzawm leh a ni ang.
