Vawiin kha Mara rama chanchin \ha thlen champha vawi 110-na a ni a, Missionary day hi Mara ram pumah Evangelical Church of Maraland hnuaia Kohhran hrang hrang leh Congregational Church of India Maraland-in anmahni hmunah \heuhah urhsun takin an hmang a, chawhma, chhun leh zanah Pathian biak inkhawm an nei a ni. ECM chuan chawhma leh chhun lam thupui atan ‘Chanchin \ha thlentute ke chu a va mawi em’ tih an hmang a, zan lamah ‘Lalpan thil ropui tak min tihsak a, kan lawm hle a ni’ tih an hmang bawk. He ni hi Mara mipuiten tluang taka an lawm theih nan Mara Autonomous District Council leh a hnuaia office awm zawng zawng te leh zirna inte pawh khar a ni. Mara rama chanchin \ha pu luttu, Rev. Reginald Arthur Lorrain chuan Lakher Pioneer Mission din kum 1907 kum tir khan London chhuahsanin Mizoram a rawn pan a, Mara rama awm hmun an khuarna, Serkawr chu hemi kum September ni 26-ah a thleng a, hemi ni a\ang hian chanchin \ha hril hna an chhungkuain an thawk zui zel a, Rev. RA Lorrain hi 1944 khan kum 64 mi niin a thi a ni. An awmna hmun Serkawrah hian a nupui leh a fate chuan Pathian thu hril rawngbawlna an chhunzawm zel a, an tu leh fate zinga 8 chu Mara ramah an thi a, an fanu kum 70 mi, Pi Violet-i pawh tun thleng hian Serkawrah hian a la awm a ni.
