Manna thupek sut phutin Paritosh Chakma-a’n High Court-ah sorkar leh CYMA te a khing.
The Frontier Despatch Magazine in a tarlan danin Central YMA-in social media-a thudik lo vawrhdarha a puh, Paritosh Chakma laka FIR an thehluh, court hniamin manna thupek a chhuah chu sut phutin Mamit District-a Silsuri, Marpara mi Paritosh Chakma chuan Gauhati High Court, Aizawl Bench-ah Mizoram sorkar leh CYMA General Secretary te a khing a, Champhai Zotlanga YMA General Conference ah khan agenda pakhat, ‘Dan lo anga din Chakma Autonomous District Council (CADC) hi dan anga \hiah a nih theih nan CYMA-in hma la rawh se’ tih pass a nih hnu khan Paritosh Chakma hian social media-ah YMA hian CADC a \hiah hnuah Mara Autonomous District Council (MADC) leh Lai Autonomous District Council (LADC) te \hiah tumin hma a la ve leh nghal dawn niin social media ah a sawi a, CYMA chuan hei hi thu dik lo hmanga Mara leh Lai te tihchiai-na tiin, Paritosh-a lakah hian nikum November 10 khan Police ah FIR an thehlut a, Mamit Chief Judicial Magistrate chuan nikum December 5 khan Paritosh-a mann tura thupek Warrant of Arrest a chhuah a ni. Court thupek ang hian police te’n Paritosh-a hi man an tum a, Mahse, Mizoramah awm lovin Delhi-ah a awm tih court-ah an thlen leh a, Mamit CJM chuan Paritosh-a awmna hmuna police hotu, Delhi West District Dy. Commissioner of Police hnenah Paritosh-a hi man turin a ti a, Dy. CP pawh hian CJM thupek angin Paritosh-a hi man tumin a zawng ve ta a ni.
Police te’n Paritosh-a man tuma hma an lak tak avang hian Paritosh-a chuan Gauhati High Court, Aizawl Bench-ah a ukil kal tlangin June thla khan CrPC 482 behchhanin amah manna thupek chu sut turin ngenna a thlen a, Paritosh-a ukil SR Rabha bakah Mizoram sorkar Addl. Advocate General AK Rokhum leh CYMA General Secretary aiawhtu advocate Reuben Lalrinsanga, Salem Veng te chu June 28 khan HC-ah an inlan a, Mizoram sorkar aiawh leh CYMA GS aiawhte’n ni thum hnu-a inlan leh an rawtna chu Paritosh-a ukil hian hun tam zawk pe tura court a ngen angin High Court chuan July 20 hian an pathuma inlan leh turin a ti a ni.
