Manipur sorkarin an state police-te hren mek, Rohingya Muslim te leh Myanmar mite thawn kir dan tur ngaihtuah turin sorkar laipui a ngen. Myanmar leh India ramri, km 300 laia sei nei, Manipur-ah hian Myanmar mi 22, lung-ina tang mek an awm a, heng zinga 11 chu Rohingya mi an ni a, Myanmar sorkar hotuten an lo dawnsawn duh loh avangin, kum 2012 a\ang khan lung-inah hian an awm tawh a ni. State sorkar thuneitute chuan heng mite hi \um thum lai Myanmar-a thawn let tum tawh mah se, an hlawhchham zel niin an sawi a, an tan hun tur a tawp tawh avangin, thawn kir dan ngaihtuahpui turin sorkar laipui-ah an hming leh Rakhine-a an chenna bakah lehkha pawimawh dangte pawh an thehlut niin an sawi.
Rohingya Muslim raltlante chungchang hi nimin khan External Affairs Minister, Pi Sushma Swaraj chuan Bangladesh PM, Sheikh Hasina a sawipui a, Rakhine-a sipai an tirhte ko kir tur leh Rohingya mite an rama let leh phalsak tura Myanmar sorkar nawr chungchangte an sawi dun a ni. Bangladesh PM thupuangtu, Nazrul Islam chuan Rohingya raltlante hi lo dawngsawng lo thei an nih loh thu leh, a enkawlna senso pawh ram dangte \anpuina tel lo chuan an tlin loh thute a sawi a, raltlante hi an kir leh thuai loh chuan Bangladesh tan pawh phurrit lian tak an ni thuai dawn niin a sawi. Rohingya Muslim refugee-te hi kawng sirah te, tlang leh hmun remchang apiangah an awm ringawt avangin, Bangladesh sorkar chuan in 14,000 sak phawt a tum a, UN sawi danin, thla hlui ni 25 a\ang khan Rohingya mi nuai 4 velin Bangladesh hi an pan tawh a ni.
