Philippines khawpui, Manila-a thlipui na tak thawk avangin mi pathum vel an thi tawh a, mi dang paruk pawh chin hriat lohin an awm. Vawiina Manila khawpuia thlipui leh ruahpui thawk avang hian nasa takin tui a lian a, zirna in, sorkar pisa leh dawr khar a ni a, thi leh mi bo-te hi mi rethei leh harsa tak tak, hmun hlauhawm laia khawsate an ni a, thlipui thawk tur avanga sorkarin insawn chhuak tura a tih hnuah pawh awmna tur dang an neih loh avangin an awmna ngaiah an awm nia hriat a ni a, sorkar thuneitute sawi danin, an khawsakna hmun hi lei min duhna lai a nih vangin khawtlang hruaitute pawhin insawn chhuak turin an hrilh fo tawh a, mahse kalna tur dang an hriat loh vangin an awm zel a ni. He thlipui, tualchhung miten Maring tiha an vuah hi darkar khata km 100 vela chakin a thawk a, Philippines chhak lama Mauban khua a nuai hnuah hmar chhak lam panin, Luzon thliarkar leh Manila khawpui a nuai leh a, hmeichhe naupang pakhat, kum 12 mi chu Manila daifema tui lianah a tla hlum niin sorkar hlotuten an sawi. Manila chhim lama Calamba City-ah tui lianin lui kama in pakhat a lak avangin heng ina cheng, mi paruk chu chin hriat lohin an awm niin an sawi bawk.
Chanchin Thar Manila-ah thlipui thawk, mi pathum thi
