Health Minister, Pu Lal Thanzara chuan vawiin khan Mamit District Hospital-ah Damdawi man tlawm zawka zawrhna Dawr, Generic Drug Store a hawng. Hawnna inkhawma thu sawiin Pu Lal Thanzara chuan Pradhan Mantri Bhartiya Jan Aushadi Kendra, Mizoten Damdawi man tlawm zawrhna Dawr tih an vuah hi Prime Minister-in mi harsa zawk ten damdawi tha man tlawm zawka an lei theihna tur atana a ruahman niin a sawi a, he damdawi dawra damdawi zawrhte hi tha tawk leh chak tawk, a quality pawh mithiamten an enfiah vek tawh a ni tih sawiin, a man a tlawm avangin rinhleh tur a ni lova, damdawi man to te nen a hnathawh dan a inang vek niin a sawi a ni. Minister chuan Doctor te chu damlote tan damdawi man tlawm, generic damdawi chawh uar turin a chah bawk a ni. Health Minister chuan Mamit District Hospital khum 100 awm theihna tura siam len tum a nih thu te, a sakna tur sum NEC atanga dil a nih thu te, reiloteah hmuh theih beisei a ni tih te a sawi bawk a ni. He inkhawm hi Dr. PC Lalliannghaka’n a kaihruai a ni.
