Maldives ram Politics buaina sosang chho zelah Police te chuan Supreme Court Chief Justice leh Judge dang pakhat an man.
Chief Justice Abdulla Saeed leh Judge dang Ali Hameed te hi sorkarin Emergency a puan hnu lawkah man an ni a, man an nih chhan leh eng thubuai nge siam sak an nih tih pawh puan a la ni lo. President Abdulla Yameen chuan court thupek anga eptu pawl hruaitute a chhuah duh loh avangin buaina hi a intan chho a, eptu pawlte chuan sorkar thil tih dan chu na takin an sawisel a, Khawlvel ram hrang te pawhin an dem thu an sawi chhuak bawk.
Kar kalta khan Maldives Supreme Court chuan eptu party hruaitu thenkhat te chu chhuah zalen turin thupek a siam a, hemi rual hian kum 2015-a President hmasa Mohammed Nasheed chung thu rel a nih dan pawh ram danpui kalh a ni a ti bawk a. Mohamed Nasheed hi tunah ram dangah a biru mek a ni. Police Commissioner chuan court thupek hi a kenkawh tur thu a sawi a, President Abulla Yameen hian he police commissioner hi a ban tir nghal a. Sipai te chu President paihthlak tumna reng reng veng tura thupek an ni. Nimin khan Sorkar chuan Emergency puangin sipai ten thuneihna sang tak an nei nghal a, President hlui tuna eptu party te nena inthurual Maumoom Abdul Gayoom pawh a chenna in ah pawn chhuak thei lova hren beh mek a ni bawk.
