Vawiin khan Mahni Thlaithar Zuar pawl hruaituten ZNP President, Pu Lalduhoma chu a pisa-ah kawmin, an harsatnate an sawipui a, an thlai thar hralhna tur dawhkan an neih loh chungchangte, an thlai thar hralh hun bituk chu zing dar 9 thleng chauh a nih avanga an inhralh zawh hman loh thute, an thlai zawrhte khuhtu hulhliap an neih loh avanga an harsatna te leh zan lama eng tha an neih loh chungchangte an sawipui a ni. ZNP President chuan Mahni Thlai Thar Zuar pawl chu a ngaih pawimawh thu leh theihtawp chhuaha puih a inhuam thu lo hrilhin, kum 2004 November ni 16-ah mahni thlai thar zuartuten dawhkan nena inzawrhna tur an neih ve theih dan tur hi Assembly-ah a lo sawi tawh thu leh, hemi bawhzui nan hian MNF sorkarin Millenium Centre kawtah thlai thar zawrhna tur dawhkan a siamsak thu te, a hnu lawkah Police hmanga um chhuah an nih thu leh an thlai tharte pawh laksak an nih bakah, an dawhkante pawh chhut chhiat a nih thu te, mahni thlai thar zuartute ngei pawh Reiek kai Tlawng kamah motor-a phurh thlaka hnutchhiah hial an lo nih tawh thute sawiin, vawiin tun hian mahni thlai thar zuarte hian sorkar ngaihsak an la hlawh lo niin a sawi a, an harsatna hi sorkarin enpuiin chin felsak ngei thei se a duh thu sawiin, thuneihna an chan chuan Mahni Thlai Thar Zuarte inzawrhna tur bik Market hran siam a lo tiam nia hriat a ni. Mahni Thlai Thar Zuar Association Member-te hi khaw hrang hrang 35 atanga kal khawm an ni a, Mizoram pumah member sang khat chuang an nei nia hriat a ni.
