Ruihhlo, zu leh vaihlo laka zirlaite an fihlim theihna tura hmalakna pakhat, Mizoram Against Drugs, Alcohol and Tobacco, Project Himna MADAT tia vuah hnuaia hmalak tawhnate Aizawl Bawrhsap Dr. A. Muthamma hovin sub-committee member ten an thlirho. Bawrhsap chuan HIMNA-MADAT chu Mizoram thangtharte ruihtheih thil laka an fihlim theihna tura hmalakna a nih thu a sawi a, zirchianna thenkhat atangin zirlai naupang tam takin ruihhlo that lohna leh ruihhlo do kawngah zirtirna an dawng tlem tih hriat a ni a, Himna-MADAT hmangin zirlai naupangte thleng phak tur inzirtirna beihpui thlak chhoh mek a ni a ti. Hmun hrang hrang tlawh kuala zirtirna petu, Mobile Campaign team-te hmalak tawh dan te leh sorkar kum thara hmalak zel dan turte an sawi ho a ni. Project Himna Mizoram Against Drugs, Alcohol and Tobacco (MADAT) hi nikum June ni 21 khan New Economic Development Policy hnuaiah duan a ni a. He Project hi Aizawl Bawrhsap Pisa kaltlanga bul tan phawt a ni a, Upper Primary School zirlai chin chung lam a huam a ni.
