Ningani kal ta, tun thla ni 21-a Lunglei Venglaia National Flag haltu mi 7 chu tukin khawvar hma khan Samlukhai khuaah man an ni. Heng mite hi Lunglei Police-te ngen angin Sialsuk Police-ten tukin dar 2 vel khan Samlukhaiah an man a, Lunglei Police ten la chhawngin, vawiin chawhnu khan Lunglei Police Station an thlenpui a ni. Police hotute hnen a\anga thu dawn danin heng mite hi Samlukhai khaw mi, Lalrinawma (Awmtea tia hriat) leh Lalruattluanga bakah mi dangte chu Bualpui V khaw mite an ni.
Lunglei Addl. SP, Pu J. Lalmuankima sawi danin, Lalrinawma hian tun hmain Mizoram hi tumah awpna hnuaiah a awm ngai lova, Pu Ch. Saprawnga te hun laiin India awpna hnuaiah a l<t ta a, tunah hian China ral a lo lian ang a, Mizoram hi India awpna lak a\angin a zalen leh dawn a ni, a ti a, hemi entir nan hian hnam puanzar hi an hal ta niin an sawi a, vai pathian lim pawh an tichhia nia hriat a ni. Heng mite hi National Flag hal leh tihnawmnah khapna dan, Prevention of Insult to National Honour Act, 1971 Section II leh Indian Penal Code hnuaia dan ding laite tlawh chhanin Lunglei Police Station-ah thubuai siamsak an ni a, vawiin chawhnu khan Magistrate hmaa inlantir an nih hnuah Magistrate thu angin District Jail-ah dah an ni. Police-te sawi danin, heng mite zinga pakhat Lalrinawma, Awmtea tia hriat chuan Pathian thu lama thil entir tur nei nia insawiin Samlukhai khuaah amah chu a nung chunga phum turin a thurualpuite a lo hriattir tawh a, an thil tih dan chu Sialsuk Police-ten an hriatin a hmuna enfiah turin an kal a, ram dan bawhchhiatna tling khawpa thil ti lo tura an hrilh hnuah leia vur lovin thlan chhunga tih tur a tihkim thlengin a mu a ni. Samlukhai khaw mite hnen a\anga ZONET thu dawn danin, Awmtea leh amah zuitute hi Presbyterian Kohhran mi, Pathian thu hrila hmun hrang hrang tlawha zin chhuak \hin an ni a, Samlukhaia an haw chang pawhin inkhawm ngai pawimawh tak an ni \hin a ni.
