Lunglei District Fire Prevention Committee vawiina Lungleia thukhawm chuan tun thla ni 12 atanga ni 17 thlenga ram kan ven hapta hman dan tur chungchang an rel. Inkhawm kaihruaitu Additional DC, Pu Benjamin Lalzama chuan kumin thala ram kan ven kawngah Lunglei District chu Mizorama District 8 zinga a ti tha ber a nih theih nan tan la turin sorkar bakah mipuite leh tlawmngai pawlte a ngen a, he hapta hawnna inkhawm hi Lunglei Convention Centre-ah tun thla ni 12-ah neih a ni ang a, hapta hman chhung hian ram tikang lo tura ngenna chhungkaw tinah sem tum a nih bakah kangmei ven pawimawhzia chungchang ziak tha chanchinbu 3 thlan chhuah te chu lawmman pek tum a ni dawn niin a sawi a ni. He meeting hian PHE Deptt. chu kangmei chhuah thulha a thelhna tur tui awlsam taka hmuh theih nan Lunglawn, Chanmari, Kikawn, Serkawn leh Zotlangah te tui lak theihna siam se, kangmei ven kawngah hian Sub Hqrs. YMA leh VC Association te nen thawh ho ni se, Education Deptt. leh kohhran hrang hrang te pawh anmahni huam chhung theuhah kangmei laka fimkhur a tul zia inzirtirna pek ni se an ti bawk a ni. He meeting hian State Fire Prevention Committee a lo ruahman tawh anga kumin March ni 15 aia tlai lova lo hal kim vek turin khaw hrang hrang VC te hriattir ni se tih leh ram kang veng tha te lawmman pek ni se tih an rel bawk a ni.
