Britain ram lal in, Buckingham Palace kawtah nizan khan misual pakhatin chemte hmangin police officer pahnih a bei a, London police-te sawi danin, pawi khawihtu hi kum 20 vel mi a ni a, police officer pahnih a beih hnu hian an man nghal a ni. He thil thlen lai hian Buckingham Palace-ah hian lal chhungkaw member pakhatmah an awm lo nia hriat a ni a, police thupuangtu chuan police-te beih an nih chhan hi an la hre lo niin a sawi a, police officer pahnih hi an na vak lo niin a sawi bawk. Pawi khawihtu hi London sanaa nizan dar 8:35 vel khan police officer-te hian lal in bula dawrah chemte a pai avangin an tiding a, police-te hi a bei zui ta mai nia hriat a ni.
Belgium khawpui, Brussels laili-ah pawh mi pakhatin chemte hmangin sipaite a bei a, pawi khawihtu hi kah hlum nghal a ni. He thil hi khawpui lun lai, Boulevard Emile Jacqmain-ah Belgium sanaa nizan dar 8:20 vel khan a thleng a, helai hmun hi police leh sipaite chuan civil mite kal tlang theih loh turin an siam nghal a ni. Sorkar hotute chuan pawi khawihtu hi Somalia ram mi, kum 30 vel niin an sawi a, sipaite a beih dawn hian Muslim mi firfiakte’n pawi an khawih dawna an tih thin angin, Allah chu ropui ber rawh se, tiin a au chhuak nia sawi a ni a, sipaite’n an kah hnu khan damdawi inah a hliam tuar lovin a thi a ni.
