Pu Lalnghinglova Hmar hian vawiin khan Aizawl khawpui chhungah Street Campaign a neih chhunzawm a, heng hmun hrang hranga thu a sawinaah tun \uma inthlan tur chu tualchhung Politics nen inhnamhnawihna a nei lo tih sawiin, Mizoramah chuan mipuiten duh taka an thlan MNF Party-in hnehna taka thuneihna changin ro an rel mek a ni, a ti a. MNF chu Mizoram tana rawng an bawlna turah \ha taka ram an kaihhruai theih nan duhsakna a hlan tih sawiin, tuna MP thlanna neih tur erawh Central-a sorkar tur zawnna a ni a, MNF chu BJP thawhpuitu an nih miau avangin MNF Candidate chu mi \ha tak pawh ni se, Central BJP kaihhruai Narendra Modi lal theih nana beitu an nih avangin hnawl a, amah chu mipuiten an thlan ngam a \ul tih a sawi.
Pu Lalnghinglova Hmar chuan, tunah hian Mizoram, hnam leh sakhua chu humhim a ngai takzet tih sawiin, chumi hlenchhuak tur chuan Mizoram mipuite chu \hahnemngai taka vote thlak turin a sawm a. MLA thlan dawnah rampum huapa ‘Hnam Chhan Hnatlang’ hial koh a ni tawh a. Tunah pawh he hnatlang hi neih a ngai leh ta tih sawiin, mipuite chu tualchhung politics-a an \an lam leh awn lamte dah\haa, Kristianna leh ram leh hnam tana hlauhawm, dan him lo siam luih tumtu BJP leh an sangawizawnpuite paihthlak theihna remchang awm mek chu bawhpelh lo turin a ngen a ni. Pu Lalnghinglova Hmar chuan, MP thlanna neih turah Rulling leh Rulling lo an awm lo tih sawiin, tun hi sorkar siamtu tur zawnna a ni a, tu pawh thlantlin ni mah se, MP Fund chu a pungin a kiam dawn lova, amah chu thlan tlin a nih chuan \halai thawh tur mumal nei lo tam takte leh kuthnathawka eizawngte tan nasa taka \an a lak tur thu leh MP Fund aia tam Networking hmanga hailuh theih a inbeisei thu a sawi a. Sorkar laipuiah BJP in thuneihna an chan a\angin Kristian-te’n harsatna an tawk chho nasa hle a, ramdang a\anga \anpuina lo lut tur pawh an titawp tih sawiin, chu aia la hlauhawm zawk Citizenship Amendment Bill chu an sorkar leh a nih chuan thar thawh leh an tum avangin he Bill duh lotu zawng zawng chu amah vote vek tur leh MNF mite pawh he Bill laka an him theih nan amah chu vote turin a sawm a ni.
