Mamata Banerjee chuan Kolkata Brigade Parade Ground-a buatsaih, he rally hi India ram chak zawk, hmasawn zawk leh inlungrual zawk din tura huaihawt anih thu sawiin, a ngaihdan thlawptu ram hruaitute leh India ram mipuite chu \anho puiah a sawm a ni. Rally ah hian chief minister nilai Arvind Kejriwal, Chandrababu Naidu leh H D Kumaraswamy te leh chief minister hlui Farooq Abdullah, Omar Abdullah, Akhilesh Yadav leh Gegong Apang te tiamin, hruaitu lu 20 chuang an tel a ni. Congress President Rahul Gandhi leh a nu Sonia Gandhi te chu tel thei lovin an party a\angin Congress hotu hlun Mallikarjun Kharge leh Manu Singhvi te tel turin an tir a ni. Trinamool Congress (TMC) thlawptu leh party worker mi nuai chuang rally ah hian an pungkhawm a ni.
Rally-a tel te hian Modi-a sorkar hnuaiah India ram dinhmun a chhe zel nia sawiin hmasawn aiin a hnungtawlh zawngin a ram a kal mek a ni an ti a, mipui rorelnaa kut ke pawimawh, democratic instituion te chu an tichhiaah Modi-a sorkar chu puhin, siam\ha turin \anrual a ngai a ni an ti. Arvind Kejriwal-a chuan Modi leh Amit Shah te chuan kum 5 chhung lekin, Pakistan thil tum ber angin, India ram an \henhrang a ni a ti a, BJP chu an tling leh a nih chuan Constituion pawh an thlak duh mai dawn a ni a ti.
BJP hruaitu Babul Supriyo chuan Mamata Banerjee rally huaihawt hi eiruk ching hotulute punkhawmna mai an ni tiin an thil tum chu a pawnlang maia \hat dernaah a ngaih thu a sawi.
Police te sawidan chuan Brigade Parade Groundah hian mi nuai 7 vel an leng a, buaina a thlen loh nan venhimna \ha tak hnuaiah rally hi kalpui a ni.
