MNF party MP Candidate Pu C Lalrosanga chuan an khingpuiten Citizenship Ammendment Bill 2016 hmangin nasa takin bei mah se a dinhmun a hniam phah a rin loh thu a sawi a, hnehna chan ngei a inrin thu a sawi.
Zonet zawhna chhangin Congress leh ZPM-in an thlawp Independent Candidate, Pu Lalnghinglova Hmar chuan, ama thawhna Vanglaini chanchinbu-in tukin chhuaka tihsual palh an nei chu pawi a tih thu sawiin, he thil hi hlawkpui tur lam aiin ama tan tak pawh thil pawi thei ni zawka a hriat thu a sawi.
Pu Lalnghinglova Hmar chuan, Aizawl khawpui chhung veng hrang hrang a fankualnaa mipuiin an lo dawn sawn danah a lawm tih sawiin, tling turin beiseina sang tak a neih thu a sawi a. Campaign laia a lo sawi tawh \hin angin, MP atan thlan tlin a nih chuan kawng hrang hranga Mizoram tan hmalak a tum thu a sawi.
PRISM Party Candidate Pu TBC Lalvenchhunga chuan Champhaiah vote a thlak a, Zonet corr zawhna chhangin mipuiin Politics an lo hriat \hin dan chu tun inthlanin a thlak nia a hriat thu a sawi a, vanneihna a chan ngei a beisei tih a sawi.
Independent Candidate, Pu Lalhriatrenga Chhangte chuan, Inthlan result chu engpawh ni se, he inthlan hian Mizoram leh Hnam tan awmze thui tak a neih a beisei tih a sawi.
