Mipuite vote hmuh tumin political party hotute chuan ram chhung hmun hrang hrangah campaign beihpui an thlak a, PM Narendra Modi chuan Jharkhand leh West Bengal-ah vantlang inkhawm \um thum a huaihawt a, BJP President Amit Shah chuan Uttar Pradesh-a Chitrakoot, Pratapgarh, Jaunpur leh Prayagraj-ah te vantlang inkhawmah thu a sawi bawk a ni.
Lemchan thiam kum 62 mi Sunny Deol chuan Punjab-a Gurdaspur bialah ding turin a hming a pe lut a, he bialah hian Congress MP nilai Sunil Jakhar, AAP candidate Peter Masih leh PDA candidate Lal Chand te nen an inkhing dawn a ni.
Congress President Rahul Gandhi chuan Rajasthan-a Dhaulpur, Churu leh Jaipur-ah campaign beihpui a thlak a, Supreme Court-a a laka thubuai thehluttu, BJP mi Meenakshi Lekhi-i chu mimal ham\hatna tur leh Politics-a in tih lar tum vanga politics thila inhnialna thu-a court hnuklutah puhin he thubuai hi hnawl turin Supreme Court hnenah ngenna a thehlut a ni.
Congress party chuan PM Modi leh Amit Shah te laka hmala tura an ngenna Election Commission-in a bawhzui loh avangin court-a kal an tum thu an puang a, Congress thupuangtu Abhishek Manu Singhvi chuan thla hmasa-a EC-in campaign-na-ah ram sipai te chungchang sawi lo tura thupek a chhuah hnuah PM Modi leh Amit Shah te hian an campaign-na-ah an sorkar-na hnuaia sipai te hmalakna chu an la sawilang fo a ni an ti a, EC hnena an zualko hnuah pawh hmalakna a awm loh avangin court-ah an kal dawn tih a sawi.
