He thu hi vawiina MNF Party office Hnam Run chhung inkhawm a hmanpuinaah sawiin Pu K Lalrinliana chuan, heng khaw dinah te hian Kohhran leh zirna In te din nghal a ni \hin tih a sawi a, mamawh a thuhmun vek si avangin khaw tam lutuk chu Sorkar tan a buaithlak a, tuna khaw awmsa bak din belh tawh loh chu sorkar duhdan a ni a ti. Pu K Lalrinliana chuan, tuna VC term hman mek kum 5 chu tihtawi rawtna a awm tih a sawi a, Women reservation chungchangah pawh Mizo khawtlang nun leh sakhua nena inkalh loa dan siam an tum tih a sawi.
Supply Minister ni bawk Pu K Lalrinliana hian, thlakhata ration buhfai semchhuah chu Qntls 110,000 vel a nih thu sawiin heng buhfai te hi MIZOFED leh FCI kaltlanga lei a nih thu a sawi a, hetihlai hian State dang a\anga Buhfai Sorkarin a lei leh a leina tur Sorkar laipuiin a pek chu tihtawp nita se a buaithlak hle dawn a, hei vang hian kum khata vawi 2 emaw vawi 3 emaw buh thar thei turin sorkarin ngaihtuahna a seng a ni a ti. Minister hian Muallungthuah Gas Botling Plant dah tuma hmalak a nih thu a sawi a, chhungkaw pakhatin eirawngbawlna Gas connection pakhat aia tam an nei \hin chu harsatna thlentu pakhat a ni tih a sawi. Fisheries changtu nibawk Pu K Lalrinliana hian Mizorama luidung sangha te humhalh turin dan thar \ha zawk duan mek a ni a ti bawk.
