National Highway 54-a Zemabawk dai a, Central Water Commission awmna hmun peng bulah tukin khan lei minin kawng a hnawh pinga, kawng ping hi PWD Highway Division chuan thian fai turin a bei nghal a, a nasat deuh avangin vawiin chawhnu dar 1:30 vel khan a inchhawk a lirthei lian chi kaltlang theih a siamtlang a ni a, motor inpelh theih nan kawnga lei leh lung tla te chu thenfai zui zel a ni a, khua in a zir chuan naktukah zawh fel hman beisei niin kawng enkawltu Engineering te chuan an sawi a ni. Hetih lai hian Aizawl – Thenzawl – Lunglei kawng Ngaizel khama Inrinni chawhnu a lung tla in kawng a hnawh pin chu lirthei kal theih a thenfai a ni tawh a, amaherawhchu kawng chungah lung tla leh maithei tur hlauhawm tak a awm avangin a hal thlak hna vawiin khan thawh zui a ni a, hemi chhung hian he kawngah hian motor tlan tir phal a ni lova Motor te chu Tlangnuam kaltlang kawng pahnih ah tlan tir an ni. Hetih lai hian he kawng a Sateek bula lei min thinah pawh buaina a awm rih lova, lei a tlak chang apiangin a bul a hnathawktu leh JCB dah chuan kawng a siam tlang mai thin a ni. He kawng atanga khawthlang lam a peng, Sateek – Darlung kawng Inrinni zana leimin in a hnawh pin chu nimin Pathianni khan lirthei kal theih a siam tlang a ni leh tawh bawk a ni.
