Tunhnaia ruahsur nasa avanga Mizoram chhung hmun hrang hranga leiminin kawng a hnawhpinte chu lirthei kal theiha siam tlang leh deuh vek a ni ta. PWD hotute hnen atanga thudawn danin Mizoram chak lakna kawngpui ber Silchar-Aizawl-Lunglei-Lawngtlai kawng National Highway 54 chu lirthei chitin kal theihin siam tlang a ni a, Aizawl-Thenzawl-Lunglei World Bank kawng pawh a tlang bawk a, Seling-Champhai kawng National Highway 6 te, Lengpui atanga Kanhmun kawng National Highway 44A pawh lirthei kal theiha siam tlang a ni a, hetihlai hian tunhnaia ruahsur nasa avanga hmun tam taka leiminin kawng a hnawhpinna Muallungthu leh Khumtung inkar kawng pawh vawiin khan motor te chi kal theiha siam tlang a ni leh a ni a, motor lian chi kal theiha siam tlang turin beihzui zel a ni. ZONET zawhna chhangin kawng enkawltu Executive Engineer, Pu Zirsangliana chuan he kawng hi kar kalta Ningania ruah nasa taka sur avang khan he kawng hi hmun tam takah a ping tan a, thianfai tura beih lai mekin ruah nasa taka a sur zui zel avangin hmundang tam takah leiminin kawng a hnawhping leh a, hemi bakah hian Tuirial thlen hma Muallungthu lamah hmun hnihah kawng chhuat a tlahniam a, Tuirial pelh hnu, Tuirial atanga km 10 velah pawh kawng chhuat a tlahniam bawk a, a siamthat chhung leh leiminin kawng a hnawhpin thenfai chhung hian ruahsur nasa avanga leiminin kawng a hnawhpin belh zel avangin he kawng hi vawiin khan lirthei te chi kal theiha siam tlang theih a ni ta chauh niin a sawi a, leimin vanga kawng a pin thluh a thianfai thuai turin hnathawktu leh khawl pawh dah zui zel niin a sawi a ni. Hetihlai hian Lunglei-Tlabung kawng pawh lirthei kal theihin siam tlang a ni bawk a ni.
