Lawngtlai District-a Myanmar ramri depa awm, Sabualtlang khaw mi, Monondo, kum 67 mi chu nimin chawhnu khan Myanmar sipaiten an kap hliam. Lawngtlaia kan Corr. sawi danin, Monondo leh a nupui hi Sihlui-ah anchiri zawngin an kal a, luia an awm laiin Myanmar sipaite chuan hel emaw tiin heng mite hi an kap a, Monondo hi a khup ding lam ruh an kah tliah bakah a malpui vei lamah a thler zawnga kah a ni bawk a, Myanmar sipaiten an kah lai hian Monondo nupui chuan hel pawl an ni lo tih te, India mi an ni tihte ring taka auvin a sawi a, hemi hnu hian Myanmar sipaite chuan Monondo te nupa chu a hmuna kalin an en a, damdawi, ei tur thil tlem leh hmeh-en (torchlight) an pek hnuah an kalsan leh ta niin a nupui, Pi Banati chuan a sawi. He vanduaina thleng hi an hriat veleh Sabualtlang YLA chuan Monondo hi an kahna, ramhnuai a\angin an zawn haw a, tukin khan Lawngtlai District Hospital thlenpui a ni a, a \ul dan anga enkawl mek a ni. Lawngtlaia kan Corr. zawhna chhangin amah enkawltu, Dr. Biakvela chuan Monondo BP chu a hniam thu te, thawk lamah harsatna a neih thu te, a dinhmun a ziaawm veleh hmunpui lam pana thawn a ngai tur thute a sawi a ni. Sabualtlang bialtu MDC, Pu KC Malsawmdawngliana chuan he vanduaina thleng hi a hriat veleh damdawi inah Pu Monondo hi a kan nghal a, amah enkawlna senso zawng zawng a tumsak bakah a enkawl zelna senso pawh a tumsak dawn a ni.
Myanmar sipaiten Pu Monondo an kahna hmun hi nizan vek khan Tuithumthar Camp-a awm, Assam Rifles te leh Bungtlang South-a awm Police-ten an pan nghal a, thil awm dan an enfiah dawn a ni.
