Lawngtlai District-a ramri depa awm khaw 4-a Myanmar mi, raltlan lo lutte chu vawiin khan Lawngtlai Bawrhsap, Dr. Arun T., SP, Pu Lalsanglura, Chief Medical Officer, Dr. Thani Pachuau leh Officer dangten an tlawh. Lawngtlaia ZONET Corr. sawi danin, ram dang mi raltlante hi Laitlangah 543, Zochachhuahah 401, Hmawngbuchhuahah 229 leh Dumzautlangah 121 an awm a, heng mite hi Rakhine hnam tia hriat vek, Mizo \awng thiam lo an ni. Heng mite tlawhtu, Bawrhsap leh Officer dangte hian chhawmdawl lailawkna tur buhfai quintal 35 an keng a, an awmna hmun hrang hrangah hian Lawngtlai District Hospital a\anga thawk chhuak, Doctor-te leh anmahni puitute chuan an hriselna dinhmun ensakin an mamawh, damdawite a thlawnin an pe a, District SP chuan raltlante chhinchhiahtu tur leh thil awm dan thli thlaitu Police te a dah bakah 2nd Battalion MAP mite pawh anmahni veng him turin a dah bawk a ni. Myanmar lam ramri vengtu, Assam Rifles-te pawhin ramri hi \ha takin an veng niin an Commandant, Col. S. Rathor chuan ZONET a hrilh a, Lawngtlai District-a Myanmar ramri bul velah hian Arakan Army tia hriat hel pawlte leh Myanmar sipai an inkah \hin avangin boruak a ralmuang lo hle a, Myanmar lama khaw hmasa ber, Varang leh Mizorama khaw tawp ber, Laitlang velah a khat tawkin silai ri hriat tur a la awm reng niin tun hnaia hemi hmun tlawhtu, kan Corr. chuan a sawi a ni.
