Zonet zawhna chhangin Lawngtlai Bawrhsap, Pu N Chakhai, District Election Officer ni bawk chuan he Polling station-a vote thlak \hat tir leh tu tur Polling Party chuan vawiin chawhnu khan Ajasora thlengin thil tih fel ngaite an tifel zuia, naktuk zing dar 7 a\anga vote thlak \an tir turin ruahmanna engkim an siam fel vek a, tlai dar 4-ah vote thlak zawh a ni ang. Vote thlakna khawl chiat thulha invenna atan Polling Party hi EVM dang 2 leh VVPAT dang 2 ken tir an nia, boruak \ha leh ralmuang tak hnuaia inthlan a nih theih nan Executive Magistrate 1, Sector Magistrate 1, Flying Squard, Video surveilance team, Central Armed Police Force section khat leh Mizoram Sate Police engemaw zat kal tir an ni bawk a ni. Polling Party chhuak tur hi tukin khan Lawngtlai Bawrhsap Pu N Chakhai leh Tuichawng bial Returning Officer Pu R Lalremsanga ten DC Office a\angin an vailiam a ni. Puan tawh angin Ajasora Polling Station-ah hian November ni 28-a Vote thlak khan vote thlak laklawh laiin VVPAT a chhia a, chawhnu dar 2 vela thlak a nih hnuah vote thlak zui leh a nia, Vote thlak tur Polling Station Area a awm tawhte chu zanlai dar 12 thleng vote thlak zui tir an nia, EVM chu vote thlak ni chauh nung tura set a nih avangin zan dar 12 hnu lamah a thi a, he tih lai hian vote thlak lo \hahnem tak an la awm a, Observer leh Returning Officer-te rawtna siam angin naktukah vote thlak \hat a ni leh dawn ta a ni. Ajasora Polling Station hi Lawngtlai a\angin KM 150 vel a hla a nia, Vote nei mi 1080 an awma, November ni 28-a vote thlak khan mi 714 in vote an thlak hmana, a bak 366 te chuan an la thlak hmanlo a ni.
