Lawngtlai District Land Owners Association chuan ram compensation pek thuai phut nan nimin atang khan Kaladan Multi-Modal Transit Transport Road dan an tum a, an thil tih tum hi Lawngtlai Bawrhsap leh SP ten an remtih loh avangin kawng dang tura thawk chhuak tumah vawiin thleng khan an awm lo. Lawngtlai District SP, Pu Lalsanglura hnen atanga ZONET thudawn danin Lawngtlai District Land Owners Association-in kawng dan an tum tih an puan avangin kawng siam hnathawktu, RDS Private Ltd. leh Atlanta ARSS mite chu hnathawk turin an chhuak ngam lova, he thil kaihhnawihah hian buaina leh tharum thawhna lam thleng a awm lova, Police te chuan thil awmdan thlirin kawng dung an fang kual reng a ni. Lawngtlaia kan Corr. sawi danin he kawng tharin a kaltlang huam chhungah hian ram neitu mi 160 velin zangnadawmna an dawng tawh a, tunah hian zangnadawmna la hmu lo nia insawi mi 303 an awm a ni.
