Lawngtlai District-a Myanmar ramri depa awm, Parva leh a chhehvel khaw rama bomb phum rukte dap chhuaka sut turin, Lawngtlai District Bawrhsap, Dr. Arun T. chuan ramri vengtu Assam Rifles te a ngen.
Parva leh a chhehvel khaw rama hian rahpuah bomb, land mine Civil miten an rah puah thin avang leh he lai hmunah hian land mine phum ruk tam tak a awm nia rin a nih avangin Dr Arun T hian hma la turin Assam Rifles te hi a ngen a. ZONET zawhna chhangin Lawngtlai Bawrhsap chuan hemi chungchang hi Police leh Assam Rifles te nen tun hnai khan sawiho tawh a ni a ti a, Assam Rifles hotute chu bomb phum ruk dap chhuahna hmanrua nen helai hmuna feh chhuak thuai tura ngen an ni a, tunah hian an hmanraw neih ang ang leh uifingte nen an thawk chhuak tawh niin a sawi. Puan tawh angin Myanmar ramria awm, Kawnkhaw nu, fa 4 nei, Pi Khusoma, kum 37 mi chuan tun thla ni 18 khan a lo kawngah rahpuah bomb a rap puaka, a tukah a hliam tuar lovin a thi a, tun thla ni 15 pawh khan Burdukbanga khua, Jitua Tongchongya, kum 26 mi chu rahpuah bomb rah puah vangin a ke veilam tan sak a lo ni tawh a, tun thla ni 12 khan Sabualtlang khaw mi, Monodo, kum 67 mi chu Myanmar Sipaiten Hel emaw tiin na takin an kap hliam a, nikum November ni 25 khan Tuichawngtlang khaw mi, Robichondro, kum 20 mi chu hel pawl leh sipaite inkahna silaimu lengin a lo kap fuh palh tawh bawk a ni
