Myanmar sipai leh hel pawl, Arakan Army tia hriatte inbeihna avanga Myanmar mi, Lawngtlai District-a ral tlante chu Zochachhuah leh Hmawngbuchhuah-ah dah khawm tum a ni. Lawngtlai District hotute hnen a\anga ZONET thu dawn danin ral tlante hi Zochachhuah leh Hmawngbuchhuah bakah Dumzautlang leh Laitlangah dah khawm an ni a, Dumzautlanga awmte chu Hmawngbuchhuahah sawn a, Hmawngbuchhuah Refugee Camp bula an awmna tur buatsaih tum a ni a, thil awm dan enfiah hmasa turin naktukah Lawngtlai Additional DC, Pu Dolianbuaia leh SDPO, Pu Victor Zothansanga an kal dawn a ni. Laitlanga awmte Camp chu ramria inkahna hmun a\anga silai mu leng lakin a thlen phak avangin he Camp-a awm zawng zawngte chu nikum khan Dumzautlangah leh Hmawngbuchhuahah sem darh an lo ni tawh a ni. Ramria Myanmar Sipai leh Arakan Army tia hriat hel pawlte inkahna hi hun engemaw chen chawlhsan a ni tawh a, Myanmar sorkar chuan raltlante hi an awmna hmunah an let leh thei tawh niin a sawi a, amaherawhchu, raltlante hi helpawl lam thlawptu-ah Myanmar sipaiten an ngaih avangin an la haw ngam lo niin ral tlante chuan an sawi a ni. Myanmar mi ral tlan, tun thlenga Mizorama la awmte hi 1,440 niin Police te chuan an sawi.
